ԱԳ նախարար Արարատ Միրզոյանը կառավարության նիստում տեղեկացրել է, որ ՄԱԿ-ի Անվտանգության խորհրդում փաստաթուղթ դեռ չի ընդունվել, սակայն դա չպետք է նսեմացնի տեղի ունեցած քննարկումը։

Անդրադառնալով ՄԱԿ ԱԽ-ում քննարկումներին՝ Միրզոյանը խոստովանել է, որ որոշ երկրների կամ երկրի դեպքում ակնկալիքները մի փոքր ավելի էին, և որոշ դեպքերում այդ ակնկալիքները ոչ այդքան արդարացան։

Նա նշել է, որ քննարկումը ցույց տվեց՝ միջազգային հանրության շրջանում շատ հստակ ընկալում կա, որ սա ագրեսիա է, ներխուժում է ՀՀ տարածք, որ թիրախավորվել են քաղաքացիական ենթակառուցվածքներ և որ ներխուժողը պետք է վերադառնա ելման դիրքեր։

Միրզոյնաը շեշտել է նաև, որ բազմիցս օգտագործվել է ագրեսիա եզրույթը:

ԱԳ նախարար կարևորել է նաև այն փաստը, որ բազմաթիվ երկրներ քննարկումներում խոսել են նաև Լեռնային Ղարաբաղի հակամարտության, ԼՂ հիմնախնդրի մասին՝ հավելելով, որ այդպիսով Բաքվի այն թեզը, թե ԼՂ հիմնախնդիր, ԼՂ հարց էլ չկա, ստացավ իր համարժեք պատասխանը։

Սեպտեմբերի 13-ին՝ ժամը 00:05-ից Ադրբեջանի ԶՈւ ստորաբաժանումները Գորիսի, Կապանի, Ջերմուկի, Վարդենիսի, Սոթքի խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ, կիրառվել են նաև ԱԹՍ-ներ, հրետանի, ականանետեր՝ թիրախավորելով թե ռազմական, և թե քաղաքացիական ենթակառուցվածքները։ Սեպտեմբերի 14-ի երեկոյից հրադադար է հաստատվել, սակայն իրավիճակը շարունակում է մնալ ծայրահեղ լարված։

Սեպտեմբերի 16-ի դրությամբ հայկական կողմը 135 զոհ ունի, բայց թիվը, ըստ ՀՀ վարչապետի, վերջնական չէ։