Ամենայն Հայոց կաթողիկոս Գարեգին Երկրորդն առանձին քննարկումներ կունենա նախկին նախագահների հետ։ Այդ մասին ֆեյսբուքյան իր էջում տեղեկացրել է Մայր Աթոռի Տեղեկատվական համակարգի տնօրեն քահանա Եսայի Արթենյանը։
ՀՀ առաջին նախագահ Լևոն Տեր-Պետրոսյանը հայտարարել է, թե իշխանությունների և ընդդիմության միջև Վեհափառ հայրապետի նախաձեռնած հարթակի անհրաժեշտությունը կարելի է սպառված համարել։
«Ամենայն Հայոց կաթողիկոսը գնահատում է ՀՀ և ԼՂՀ նախագահների պատրաստակամությունը՝ հայտնի հանդիպման ձևաչափով արծարծելու երկրի առջև ծառացած մարտահրավերները և դրանց հաղթահարման հնարավոր ուղիները։ Վեհափառ Հայրապետն առանձին քննարկումներ կունենա նախագահների հետ, որոնց արդյունքում կհստակեցվի այս ձևաչափով հանդիպումների շարունակությունը»,-ասվում է գրառման մեջ։
Տեր-Պետրոսյանն արձագանքել էր վարչապետ Նիկոլ Փաշինյանի «անձնական/ընտանեկան լրատվամիջոցի հրապարակմանը, որն, ըստ էության, մերժողական պատասխան է ընդդիմության և իշխանության միջև երկխոսություն սկսելու առաջարկին»: «Պետք է արձանագրել, որ իշխանությունների և ընդդիմության միջև Վեհափառ հայրապետի նախաձեռնած հարթակի անհրաժեշտությունը կարելի է սպառված համարել, ինչը, սակայն, ամենևին չի նսեմացնում Վեհափառի համառ ջանքերը, որոնք, սույն արձագանքի առիթը հանդիսացող հրապարակման փաստով, արդեն իսկ տվեցին իրենց արդյունքը: Ի դեպ, ՀՀ Առաջին նախագահը հարկ է համարում նաև ընդգծել, որ Վեհափառի նախաձեռնության շնորհիվ տեղի ունեցավ նշանակալից իրադարձություն. 1998 թվականից ի վեր՝ Հայաստանում կայացավ առաջին լուրջ քաղաքական բանավեճը»,-ասվում է գրառման մեջ:
