Զախարովա․ ՌԴ-ն շահագրգռված է, որ ենթադրյալ ռազմական հանցագործությունների մասին նյութերը մանրակրկիտ հետաքննվեն

PanARMENIAN.Net - Ռուսաստանը շահագրգռված է, որ ենթադրյալ ռազմական հանցագործությունների մասին նյութերը մանրակրկիտ հետաքննվեն։ Այդ մասին հայտարարել է ՌԴ ԱԳՆ պաշտոնական ներկայացուցիչր Մարիա Զախարովան՝ պատասխանելով սեպտեմբերի «հայ զինծառայողների գնդակահարության և առաջին ղարաբաղյան պատերազմի ժամանակ անետ կորած ադրբեջանցի զինծառայողների մասին հարցին։

«Բոլոր նման դեպքերը պահանջում են անհապաղ, մանրակրկիտ և համապարփակ վերլուծություն, այդ թվում պատերազմական հանցագործությունների հատկանիշով»,-ասել է Զախարովան, գրում է Sputnik Արմենիան։

Զախարովան ասել է, թե «նման տեղեկություններ պարբերաբար են հայտնվում և հնչեցվում երկու կողմից»։ Նա հավելել է, որ ռուսական կողմը հնարավորություն ունի ծանոթանալու այդ նյութերին ոչ միայն ԶԼՄ-ներից, այլ նաև կողմերի փոխանցած նյութերից։

Զախարովան շեշտել է, որ կողմերը պետք է հավատարիմ մնան ՌԴ, ՀՀ և Ադրբեջանի ղեկավարների եռակողմ հայտարարությունների դրույթներին, այդ թվում «մնացած հարցերի լուծման նպատակով»։ Նա հավելել է, որ դա վերաբերում է և գերիների փոխանակմանը, և անհետ կորածների ճակատագրի բացահայտմանը, և պատմամշակութային ժառանգության պաշտպանությանը։

Սոցցանցերում տեսանյութ էր տարածվել ադրբեջանական ԶՈւ կողմից հայ գերիների գնդակահարության մասին։ ՄԻՊ համապատասխան վերլուծություններն ուղարկվել են Միջազգային մասնագիտացված կազմակերպություններին ու նաև այլ դերակատարներին։ Իրավապաշտպան Սիրանուշ Սահակյանը նշել է, որ գրեթե վստահ են, որ վայրագությունը տեղի է ունեցել սեպտեմբերի 13-ի ադրբեջանական հերթական ագրեսիայի ժամանակ և որ գերիներից 7-8 անձի նույնականացում է իրականացվում։