Քաղաքապետ․ Սիրո և հյուրընկալության քաղաքը անչափ ուրախ էր տեսնել այսքան երիտասարդ և վառ գույներ

PanARMENIAN.Net - ‌ Երևանի Կարեն Դեմիրճյանի անվան մարզահամերգային համալիրում կայացած կայացած հոբելյանական 20-րդ «Մանկական Եվրատեսիլ» մրցույթի հաղթող է դարձել Ֆրանսիայի պատվիրակ Լիսանդրոն Oh Maman! երգով՝ հավաքելով 203 միավոր։ Հայաստանը ներկայացնող Նարեն Dance երգով 2-րդ հորիզոնականում է՝ 180 միավորով։ Երրորդ հորիզոնականը 161 միավորով զբաղեցրել է Վրաստանի ներկայացուցիչ Մարիամ Բիգվավան I Believe երգով։

Հաղթողը որոշվել է ժյուրիի և առցանց քվեարկության՝ 50/50 ձայների հարաբերակցությամբ։

Երևանի քաղաքապետ Հրաչյա Սարգսյանը, ֆեյսբուքյան իր էջում անդրադառնալով մրցույթին, գրել է, որ «սիրո և հյուրընկալության քաղաքն անչափ ուրախ էր տեսնել այսքան երիտասարդ և վառ գույներ մի հարկի տակ, անթիվ փայլող աչքեր՝ լի սպասումով»։

«Դե ինչ, Երևանում կայացած հոբելյանական 20-րդ «Մանկական Եվրատեսիլ»- ում հաղթեց Ֆրանսիայի ներկայացուցիչ Լիսանդրոն՝ «Oh Maman» երգով։ Հայաստանի պատվիրակ Նարեն զբաղեցրեց 2-րդ տեղը

Ավելի քան 2800 տարվա պատմություն ունեցող, բայց միշտ երիտասարդ մեր քաղաքը հնարավոր ամեն բան արեց ձեզ զարմացնելու համար։

Ես վստահ եմ՝ Երևանը գույն ունի, և մենք փորձեցինք ցույց տալ ձեզ այն, Երևանը տրամադրություն ունի, և ես լիահույս եմ, որ դուք զգացիք այն։

Երևանը հոտ ունի և աշխարհի որ ծայրից էլ լինեք, այն դեռ կկանչի ձեզ իր մոտ։

Երևանը մեր տունն է, Երևանը մեր լավագույն ընկերն է: Ինչպես մեր լավ քաղաքացի ու սիրված երգիչ Ֆորշն է ասում` Երևանը տուն ու շենք չէ, Երևանը մենք ենք:

Իսկ մենք Ձեզ պատրաստ ենք հյուրընկալել կրկին ու կրկին։ Շնորհակալություն բոլորիդ տոն ստեղծելու, մեր փոքրիկներին հրաշք նվիրելու և 2023-ի ձմեռը նշանավորելու համար։

Էստաֆետը հանձնում ենք Ֆրանսիային»,-ասվում է գրառման մեջ։