Հարավային Կովկասում ԵՄ հատուկ ներկայացուցիչ Տոյվո Կլաարը, անդրադառնալով համացանցում շրջանառվող տեսանյութին, հայտարարել է, որ ԵՄ դիտորդական առաքելությունը չի մտել Լաչինի միջանցք, այն աշխատում է բացառապես Հայաստանի տարածքում։ Այդ մասին ասվում է նրա Twitter-ի միկրոբլոգում։
«Տեսանյութ է տարածվում, թե ինչպես են ԵՄ դիտորդական առաքելության պարեկախումբը հետևում Լաչինի միջանցք տանող ճանապարհին։ Այդ ժամանակ պարեկային խումբը գտնվել է հայ-ադրբեջանական սահմանից մոտ 1․2 կմ հեռավորության վրա գտնվող անցակետում։
ԵՄ դիտորդական առաքելությունը, իր մանդատի համաձայն, գործում է բացառապես Հայաստանի տարածքում և չի մտել Լաչինի միջանցք»,- ասվում է գրառման մեջ։
Ավելի վաղ Factor.am-ը, որն այս օրերին ուղիղ հեռարձակում է իրականացնում ճանապարհից, հայտնել էր, որ Հայաստանում առաքելությունն ավարտող ԵՄ դիտորդները Գորիս-Ստեփանակերտ ճանապարհի փակ հատվածում դիտարկումներ է իրականացրել։
Դեկտեմբերի 12-ին Lաչինի միջանցքի Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ կրկին բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին: Դեկտեմբերի 13-ին Ադրբեջանը նաև փակել էր գազի մուտքը Լեռնային Ղարաբաղ, որի մատակարարումը վերականգնվել է դեկտեմբերի 16-ի առավոտյան։