Էլեկտրամոբիլների լիցքավորման կայանները կավելանան

PanARMENIAN.Net - Էլեկտրամոբիլների լիցքավորման կայանները կավելանան։ Ազգային ժողովը 67 կողմ, 0 դեմ, 33 ձեռնպահ ձայներով ընդունել է «Էներգետիկայի մասին օրենքում» կառավարության առաջարկած փոփոխությունների նախագիծը, որով կարգավորվում է ՀՀ Էներգետիկ շուկայում արդեն մեկնարկած ազատականացման գործընթացը։

Օրենքի փոփոխությամբ կարգավորվում է Հայաստանում էլեկտրամոբիլների լիցքավորման ծառայություն մատուցող ընկերությունների գործառույթը։ Դրանք այսուհետ կդիտարկվեն ոչ թե որպես էլեկտրաէներգիա վերավաճառողներ, այլ սպառողներ։ Այդ նպատակով «Էներգետիկայի մասին» ՀՀ օրենքով թվարկված սպառողների շարքում առաջարկում է ավելացնել «էլեկտրամոբիլների լիցքավորման ծառայության մատուցում» արտահայտությունը, գրում է Sputnik Արմենիան։

Այս փոփոխությամբ կառավարությունում հաշվի են առել այն հանագամանքը, որ լիցքավորման կետերն այսօր ոչ թե էլեկտրաէներգիա են վաճառում, այլ իրենց մատուցված էլեկտրաէներգիան փոխանցում են մեկ այլ սպառողի` զրոյական սակագնով։ Այլ կերպ ասած` վաճառում են լիցքավորման ծառայությունը, այլ ոչ թե էլեկտրաէներգիան։

Այս փոփոխությամբ կառավարությունը փորձում է հեշտացնել կարգավորումն ու դրանով խթանել լիցքավորման կետերի ավելացումը։

Բայց եթե որևէ տնտեսվարող էլեկտրամոբիլների լիցքավորման հաշվին այնքան սպառում ապահովի, որ ցանկանա հանդես գալ որպես էլեկտրաէներգիա վերավաճառող, ապա իրավունք կունենա էլեկտրաէներգիաարտադրողի հետ վերավաճառքի պայմանագիր կնքել` իրավակարգավորման ու սակագնային այլ դաշտ տեղափոխվելով։

Հայաստանի էներգետիկ համակարգում կստեղծվի նոր` հաշվեկշռման ծառայություն մատուցող ընկերություն։ Ընկերությունը, որի դերը կառավարության որոշմամբ նախատեսվում է վերապահել Երևանի ՋԷԿ–ին, պետք է հաշվարկի Հայաստանում արտադրվող էլեկտրաէներգիայի արտադրման ու սպառման չափաքանակները և հնարավոր շեղումների առաջացման դեպքում կարգավորի շուկայի մասնակիցների հարաբերությունները` հնարավոր գերարտադրությունից ու թերարտադրությունից խուսափելու համար։

ՀՀ էլեկտրաէներգետիկ շուկայի ազատականացման ծրագրով 2023թ–ի փետրվարի 1-ից նախատեսվում է շուկայի շուրջ 20 տոկոսի (1,2 մլրդ ԿՎտ/ժամ) անցումը ազատ շուկայական կանոններին, սակայն ՀԾԿՀ–ի նախագահն ավելի վաղ հայտարարել էր, որ ազատականացման գործընթացն իրականում մեկնարկել է մեկ տարի առաջ ու շուկայի 20 տոկոսն արդեն աշխատում է նոր կանոններով։

Առաջին փուլում ազատական շուկային պետք է միանան ՀՀ խոշոր սպառողները, 2024թ–ից` 35 ԿՎտ/ժամ հոսանք սպառողները, իսկ 2025թ–ից` 35-ից քիչ ԿՎտ/ժամ հոսանք սպառողները։