Ատեստավորում անցած շարքային զինծառայողի աշխատավարձը կհասնի 422,000 դրամի՝ մարտական հերթապահության համար հավելավճարի հետ միասին։ Գործադիրը հաստատել է ատեստավորման կարգը։

Ներկայացնելով նախագիծը՝ պաշտպանության նախարար Սուրեն Պապիկյանն ասել է, որ ատեստավորումը ներառում է զինծառայողների մասնագիտական գիտելիքների և ծառայողական պարտականությունների իմացության թեստային գնահատումը, ինչպես նաև ֆիզիկական, կրակային և շարային պատրաստության աստիճանի գործնական գնահատումը։

Նա հայտնել է, որ թեստային առաջադրանքը կազմված կլինի 50 հարցից, իսկ ատեստավորված կհամարվի այն զինծառայողը, որ ճիշտ կպատասխանի առնվազն 35 հարցի և առնվազն «լավ» գնահատական կստանա ֆիզիկական, կրակային և շարային պատրաստությունից։

Ատեստավորումը կիրականացվի 5 կենտրոնում, կձևավորվի 10 հանձնաժողով։

Փաշինյանը հավելել է, որ ՀՀ քաղաքացիները պետք է համոզված լինեն, որ այն մարդիկ, որոնք կրում են զինվորական համազգեստ, համապատասխանում են շատ կոնկրետ չափանիշների։