Դատախազություն. Վիգեն Սարգսյանի նկատմամբ հետախուզում հայտարարելու միջոցներ են ձեռնարկվել

PanARMENIAN.Net - Երևանի ընդհանուր իրավասության դատարանը բավարարել է պաշտպանության նախկին նախարար Վիգեն Սարգսյանի նկատմամբ կալանավորումը որպես խափանման միջոց ընտրելու մասին միջնորդությունը։ Այդ մասին հայտնել են գլխավոր դատախազությունից, տեղեկացնում է Panorama.am-ը։

«Դատախազությունը հանձնարարել է վարույթն իրականացնող մարմնին, որպեսզի հետախուզում հայտարարելու հետ կապված միջոցներ ձեռնարկվեն»,- ասել են Դատախազությունից։

Պաշտպանության նախկին նախարար Վիգեն Սարգսյանին մեղադրանք է առաջադրվել` նրա հանձնարարությամբ բնակարաններ են հատկացվել համակարգի զինծառայող չհանդիսացող, հաշվառման մեջ չգտնվող, ցուցակներում ուշ ընդգրկված 26 անձի, հարուցվել է քրեական հետապնդում: Վիգեն Սարգսյանն արձագանքել է իր նկատմամբ հարուցված քրեական հետապնդմանը՝ նշելով, որ դա ոչ այլ ինչ է, քան քաղաքական հետապնդման դրսևորում, և նողկալի է։

«Հրապարակե՛ք բնակարաններ ստացածների ցանկն` յուրաքանչյուրի մարտական ուղին և վաստակը նշելով, և նրանց ցանկը, որոնց իրավունքները հսկող դատախազի կարծիքով խախտվել են: Նողկալի է»,-գրել է նա։