Առողջապահության նախկին նախարար, «Քաղաքացիական պայմանագիր» խմբակցության պատգամավոր Արսեն Թորոսյանը ֆեյսբուքյան եթերում հայտարարել է, որ, իր տեղեկություններով, Հայաստանում կարմրուկի տարածման դեպքը ներհիվանդանոցային է եղել՝ հիվանդ երեխայից մյուսին։

«Նաև ինֆորմացիա կա, որ տարածման օղակում դեր է ունեցել նաև չպատվաստված բուժաշխատողը, ինչն, ինքնին, ցավալի է»,- նշել է Թորոսյանը՝ նշելով, որ երբեմն որոշ բուժաշխատողներ ոչ միայն «տուրք են տալիս դավադրապաշտական տեսություններին», այլ նաև կոչ են անում ուրիշներին չպատվաստվել։

Նա ևս ասել է, որ սա կարմրուկի փոքր բռնկում է, և այն անձինք, ովքեր ժամանակին չեն պատվաստվել, պատվաստվեն։

Թորոսյանը նաև նշել է, թե ակտուալ է դառնում այն մոտեցումը, որ չպատվաստված երեխաների մուտքը հանրակրթական հաստատություններ ուղղակի պետք է արգելվի։

Առողջապահության նախարար Անահիտ Ավանեսյանը հայտարարել է, որ կարմրուկի առաջին դեպքը բերովի է եղել՝ երեխան այն բերել է արտերկրից, որից հետո վարակվել են այլ անձինք։

Հայաստանում կարմրուկի 20 հաստատված դեպք կա։ Հոսպիտալացված է 18 քաղաքացի, 1-ը դուրս է գրվել: Նրանց առողջական վիճակը գնահատում է միջին ծանրության: Հիվանդներից 19-ը պատվաստված չի, 1-ը թերի է պատվաստված (1 դեղաչափ)։