«Օսկարում» լավագույն ֆիլմ է ճանաչվել է «Ամեն ինչ, ամենուր և միանգամից»-ը

PanARMENIAN.Net - Լոս Անջելեսում տեղի է ունեցել «Օսկար» կինոմրցանակի հանձնման 95-րդ արարողությունը։ Լավագույն ֆիլմ է ճանաչվել «Ամեն ինչ, ամենուր և միանգամից» ֆիլմը։

Ֆիլմը 7 արձանիկ է ստացել՝ այդ թվում լավագույն մոնտաժի և լավագույն ռեժիսուրայի համար։

«Լավագույն դերասանուհի» անվանակարգում հաղթող է ճանաչվել Միշել Յեոն «Ամեն ինչ, ամենուր և միանգամից» կինոնկարում դերակատարման համար: Չինական ծագումով մալազիացի դերասանուհին առաջ է անցել Քեյթ Բլանշեթից, որը համարվում էր հաղթողի ամենահավանական թեկնածուն:

Երկրորդ պլանի լավագույն դերասան և դերասանուհի ճանաչված Կե Հյուի Կուանը և Ջեյմի Լի Քերտիսը մրցանակներին արժանացել են նույնպես «Ամեն ինչ, ամենուր և միանգամից» ֆիլմի համար:

Լավագույն դերասանը Բրենդան Ֆրեյզերն է ռեժիսոր Դարեն Արանովսկու «Կետը» ֆիլմում դերի համար։ Սա Ֆրեյզերի մեծ վերադարձն է, որը «Մումիայի» և այլ ֆիլմերի աստղն էր 90-ականների վերջում, սակայն հաջորդ տարիներին փոքր դերեր է կատարել։ Արանովսկու առաջարկն ամեն ինչ փոխեց դերասանի կարիերայում։ Ֆրեյզերը նաև փոխել է արտաքինը «Կետում» նկարահանվելու համար՝ ֆիլմն «Օսկարի» է արժանացել լավագուըյն գրիմի և վարսահարդարման համար։

«Լավագույն վավերագրական ֆիլմ» անվանակարգում «Օսկարի» է արժանացել «Նավալնի» ֆիլմը, որի ռեժիսորն է կանադացի Դենիել Ռոերը։

«Լավագույն անիմացիոն ֆիլմ» է ճանաչվել Գիլերմո դել Տորոյի «Պինոկիոն» ֆիլմը, իսկ «Լավագույն արտասահմանյան ֆիլմ»՝ «Արևմտյան ճակատում նորություն չկա» ֆիլմը։

«Ավատար. ջրի ուղին» ֆիլը մրցանակ է ստացել «Լավագույն վիզուալ էֆեկտներ» անվանակարգում։