Մխիթարյանը չի ցանկացել հանդիպել ՀՀ ընտրանու գլխավոր մարզչի հետ․ Արդեն որոշումը է կայացրել

PanARMENIAN.Net - Հայաստանի ազգային հավաքականի գլխավոր մարզիչ Ալեքսանդր Պետրակովն առաջին իսկ օրից փորձել է կապ հաստատել «Միլանի» կիսապաշտպան և Հայաստանի հավաքականի նախկին ավագ Հենրիխ Մխիթարյանի հետ, սակայն վերջինս չի ցանկացել հանդիպել նրա հետ։ Այդ մասին Պետրակովն ասել է մամուլի ասուլիսում։

«Պատրաստ էի մեկնել Միլան, որպեսզի պարզապես զրուցենք, սակայն նա չցանկացավ հանդիպել»,- ասել է Պետրակովը, հայտնում է Aysor.am-ը։

Նա հավելել է՝ տարբեր աղբյուրներից իրեն ասել են, որ Մխիթարյանը չի ցանկանում վերանայել իր՝ Հայաստանի ազգային հավաքականում կարիերան ավարտելու մասին որոշումը։

«Ես իմ օգնական Ռոման Բերեզովսկուն խնդրեցի կապ հաստատել նրա հետ ու հասկանալ, թե ինչ դիրքորոշում ունի, բայց Մխիթարյանը Բերեզովսկուն ասել է, որ արդեն կայացրել է իր որոշումն ու չի պատրաստվում փոխել այն։ Կարծում եմ՝ պետք է հարգենք Հենրիխի որոշումը, նա Հայաստանի համար եզակի ֆուտբոլիստ է, անձամբ չեմ ճանաչում նրան, բայց, բոլոր մարդկանց կարծիքները հաշվի առնելով, լսել եմ, որ շատ լավ մարդ է ու շատ լավ ֆուտբոլիստ»,- ասել է Պետրակովը։

Ավելի վաղ Մխիթարյանը «Պրոֆֆուտբոլին» հարցազրույցում անդրադարձել է Հայաստանի հավաքական վերադառնալու հավանականությանը՝ նշելով, որ մտադիր չէ վերանայել իր որոշումը և որ ավելի լավ է մեկ քայլ շուտ ավարտել կարիերան, քան երկու քայլ ուշ։

Հենրիխ Մխիթարյանը հայտարարել է Հայաստանի հավաքականից հեռանալու մասին 2022-ի մարտի սկզբին։ Դրան նախորդող 6 տարին նա հավաքականի ավագն էր։