ԱԽ քարտուղար․ Մոտ շրջանում ՀՀ և Ադրբեջանի միջև բանակցություններ են սպասվում

PanARMENIAN.Net - ՀՀ անվտանգության խորհրդի քարտուղար Արմեն Գրիգորյանը Ջերմուկում լրագրողների հետ զրույցում հայտարարել է, որ խաղաղության պայմանագրի առաջարկների վերաբերյալ մոտ շրջանում սպասվում են բանակցություններ Հայաստանի և Ադրբեջանի միջև։

«Քննարկումներ են ընթանում»,- ասել է նա, հայտնում է Aysor.am-ը։

Անդրադառնալով դիտարկմանը, թե Ադրբեջանը հայտարարել է, որ Հայաստանը 40 օրից ավելի է՝ չի փոխանցում առաջարկները՝ Գրիգորյանը նշել է, թե Ադրբեջանը ևս ուշացրել է, երբ Հայաստանն իր օրինակներն է փոխանցել։

«Դա նորմալ է։ Մենք չենք փոխանցել մի պատճառով, որովհետև նախատեսվում էին բանակցություններ, դա էր պատճառը։ Կարծում եմ, որ Ադրբեջանը միջազգային հանրության ուշադրությունը կարևոր այլ հարցերից շեղելու քաղաքականություն է վարում»,- հավելել է ԱԽ քարտուղարը։

Ապրիլի 27-ին ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ընթացքում հայտարարել է, որ Ռուսաստանի տարածքում ՀՀ և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի հանդիպման վերաբերյալ պայմանավորվածություն է ձեռք բերվել։ ՀՀ ԱԳՆ-ն դեռ չի հաստատել, որ հանդիպումը կկայանա Ռուսաստանում, սակայն նշել է, որ նախարարների հանդիպման պայմանավորվածություն կա։ ԱԳՆ-ն նշել է, որ հանդիպման կոնկրետ վայրի ու ամսաթվի մասին ավելի ուշ կհայտարարվի։