Ֆիլմարտադրության ոլորտում առաջարկվում է կիրառել ներդրումների մասնակի վերադարձի մոդելը (cash rebate)։ ԱԺ պատգամավորներ Սիսակ Գաբրիելյանն ու Թագուհի Ղազարյանը օրենքում լրացումներ և փոփոխություններ են առաջարկել «Կինեմատոգրաֆիայի մասին» օրենքում։
Դա թույլ կտա ֆիլմարտադրողին արտադրությանն անմիջականորեն առնչվող ապրանքների ու ծառայությունների համար դրամական ծախսերը մինչև 20 տոկոսի չափով վերադարձնել:
Ենթադրվում է, որ օրենքի ընդունումը կխթանի ֆիլմարտադրությունը:
Սիսակ Գաբրիելյանը տեղեկացրել է, որ մեծ հետաքրքրություն կա Հայաստանում ֆիլմարտադրության հետ կապված Հնդկաստանի, նաև՝ ԱՄՆ-ի կողմից: Նա նշել է, որ Կառավարության մի շարք առաջարկներն արդեն ընդունվել են, իսկ մնացածը կքննարկվեն առաջինից երկրորդ ընթերցում ընկած ժամանակահատվածում:
ԿԳՄՍ նախարար Ժաննա Անդրեասյանը ողջունելի է համարել փոփոխությունը։
«Ֆիլմարտադրության ոլորտում ներդրումների մասնակի վերադարձի միջազգային ձևաչափի կիրառումը կարող է շատ ավելի արդյունավետ լինել օտարերկրյա ֆիլմարտադրողների հետ աշխատանքը կազմակերպելու համար»,-ասել է նա։
Գլխադասային հանձնաժողովը հարցի վերաբերյալ տվել է դրական եզրակացություն:
