Արցախցի երիտասարդները, որոնք արդեն օրեր շարունակ ստորագրահավաք են անում «Ո՛չ Արցախի էթնիկ զտմանը» խորագրով, մայիսի 2-ից վրաններ են տեղադրել Ստեփանակերտ - Շուշի ճանապարհին։
Նրանք անժամկետ ակցիա են սկսել, հայտնում է «Փաստինֆոն»։
Երիտասարդներն իրենց ակցիան ուղղել են Արցախի և Հայաստանի Հանրապետության իշխանություններին, ինչպես նաև՝ միջազգային հանրությանը։
Դիմելով քաղաքական ուժերի ներկայացուցիչներին, երիտասարդները հանդես են եկել կոչով՝ պահանջելով Հակարիի կամրջին ադրբեջանական կողմի տեղադրած ապօրինի անցակետի ապամոնտաժումը։
Ապրիլի 23-ին Ադրբեջանը, հերթական անգամ կոպտորեն խախտելով 2020թ. եռակողմ հայտարարության դրույթները, փակել է Արցախ-Հայաստան սահմանագծին գտնվող Հակարիի կամուրջը, որը գտնվում է ՌԴ խաղաղապահ զորակազմի պատասխանատվության տիրույթում՝ Լաչինի միջանցքում։ Ադրբեջանի պետական սահմանապահ ծառայությունը հայտարարել է, որ հսկիչ անցագրային կետ է տեղակայել Լաչին-Ստեփանակերտ ճանապարհին։