Երևանի կենդանաբանական այգին համալրվել է կենդանիներով, այդ թվում՝ սպիտակ վագրով և զեբրերով, հայտնում է Երևանի քաղաքապետարանը։
Կենդանիներն այգուն է նվիրել գործարար, ԲՀԿ առաջնորդ Գագիկ Ծառուկյանը:
Նոր կենդանիների ընդհանուր թիվը 10 է՝ 2 զեբր, 2 եվրոպական եղնիկ, 1 սպիտակ վագր, 1 արջ, 4 մորուքավոր, բաշավոր ոչխար, որոնք հյուսիսաֆրիկյան տեսակի են և գրանցված են Կարմիր գրքում։
Վագրաձիերը (զեբրերը) բերվել են հարավային Աֆրիկայից: Առայժմ ապրում ու ցուցադրվում են եվրոպական՝ նույնպես նոր բերված եղնիկների հետ միևնույն ազատավանդակում։
Սպիտակ վագրին այգում տվել են «Ալբա» անունը: Հարևանությամբ նոր արջն է: Կենդանիներն առայժմ չեն ցուցադրվում:
Նվիրատվության շնորհիվ այգում հիմա արդեն 150 տեսակի ավելի քան 900 կենդանի կա: Ըստ ձեռք բերված պայմանավորվածությունների՝ սպասվում է նոր համալրում: Կենդանաբանական այգիներն առհասարակ կենդանիներ են ստանում նվիրատվության կամ էլ համանման այգիների միջև փոխանակման եղանակով: Առաջիկայում նախատեսվում է նոր նախագծերով այգին նորովի ներկայացնել՝ ավելի հարմարավետ պայմաններ ստեղծելով կենդանիների և գրավիչ միջավայր՝ այցելուների համար: