ԵԱՀԿ գործող նախագահը մտադիր է ԱՄՆ-ում հանդիպել ՀՀ ու Ադրբեջանի ԱԳ նախարարներին Արցախում իրավիճակի հարցով

PanARMENIAN.Net - ԵԱՀԿ գործող նախագահ Բույար Օսմանին հայտարարել է Նյու Յորքում ՄԱԿ-ի գլխավոր ասամբլեայի 78-րդ գլխավոր նստաշրջանի շրջանակում ՀՀ և Ադրբեջանի ԱԳ նախարարների հետ հանդիպելու մտադրության մասին: Այդ մասին նա գրել է X-ի իր միկրոբլոգում:

«Որպես ԵԱՀԿ գործող նախագահ անհանգստացած եմ Ստեփանակերտում ռազմական գործողություններով և այն վտանգով, որ սպառնում է տեղի բնակչությանը: Ես անհապաղ դեէսկալացիայի կոչ եմ անում: Խաղաղ երկխոսությունը պետք է միակ տարբերակը լինի, և մարդասիրական շահերը պետք է գերակշռեն»,- նշել է նա:

Օսմանին հայտնել է, որ այդ թեմային կանդրադառնա Ադրբեջանի ԱԳ նախարար Ջեյհուն Բայրամովի և Հայաստանի ԱԳՆ ղեկավար Արարատ Միրզոյանի հետ հանդիպման շրջանակում։

Ադրբեջանը Արցախի դեմ լայնամասշտաբ հարձակում է սկսել: Բաքուն հայտարարել է, որ անցկացվող գործողության մասին «իրազեկվել են ՌԴ խաղաղապահ զորակազմի հրամանատարությունը և Ռուս–թուրքական դիտորդական կենտրոնի ղեկավարությունը»։ Որպես նպատակ նշվել է «ՀՀ զինված ուժերի կազմավորումների զինաթափումն ու դուրսբերումը, ռազմական ենթակառուցվածքների չեզոքացումը»։ Ադրբեջանը փորձում է նախօրեին ականի պայթունից 6 ադրբեջանցու մահը բարդել հայկական կողմի վրա։

Ավելի վաղ հայտնի դարձավ, որ Արցախը զանգվածային հրետակոծության տակ է, այդ թվում՝ Ստեփանակերտը։