Հայաստանը դիտորդի կարգավիճակով հետևում է ԱՄՆ-ի, Ֆրանսիայի, Վրաստանի, Բուլղարիայի, Կիպրոսի մասնակցությամբ «Օլիմպիական համագործակցություն 23» զորավարժություններին, որոնք անցնում են Հունաստանում։
Զորավարժությունն անցնում է Հունաստանի հյուսիս-արևելքում գտնվող Պետրոխորիո զորավարժարանում՝ վերոնշյալ երկրների ցամաքային զորքերի մասնակցությամբ, հայտնում է ՏԱՍՍ–ը։
Հայաստանից բացի դիտորդի կարգավիճակով զորավարժություններին ներկա են նաև Ալբանիայի, Եգիպտոսի, Հնդկաստանի, Հորդանանի, Արաբական Միացյալ Էմիրությունների, Ռումինիայի և Սաուդյան Արաբիայի ներկայացուցիչները։
Հունաստանի ազգային պաշտպանության նախարար Նիկոս Դենդիասը, զորավարժությունների եզրափակիչ փուլի կապակցությամբ իր ողջույնի խոսքում ասել է, որ «այս բոլոր երկրների ներկայությունն ապացուցում է այն մեծացող դերը, որը Հունաստանը ձեռք է բերել Հյուսիսատլանտյան դաշինքի շրջանակներում և ընդհանուր արժեքների ու սկզբունքների պաշտպանության գործում»։
Դենդիասը հատկապես կարևորել է Ֆրանսիայի ցամաքային զորքերի մասնակցությունը։
2022–ի սեպտեմբերին Ֆրանսիան հայտարարել էր, որ պատրաստ է աջակցել Հունաստանին Թուրքիայի կողմից հնարավոր ագրեսիայի դեպքում։
ՀՀ պաշտպանության նախարար Սուրեն Պապիկյանը հոկտեմբերին պաշտպանության բնագավառի համագործակցությանը վերաբերող հարցեր է քննարկել Հայաստանում Հունաստանի արտակարգ և լիազոր դեսպան Էվանգելոս Տուրնակիսի և պաշտպանության հարցերով նորանշանակ կցորդ, գնդապետ Խրիստոս Արսենյուի հետ։