Սիմոնյան․ Խաղաղության պայմանագիրը կարող է 15 օրվա ընթացքում կնքվել, եթե Բաքուն քաղաքական կամք դրսևորի

Սիմոնյան․ Խաղաղության պայմանագիրը կարող է 15 օրվա ընթացքում կնքվել, եթե Բաքուն քաղաքական կամք դրսևորի

PanARMENIAN.Net - ԱԺ նախագահ Ալեն Սիմոնյանը լրագրողների հետ զրույցում հայտարարել է, որ Հայաստանի ու Ադրբեջանի միջև խաղաղության պայմանագիրը կարող է կնքվել առաջիկա 15 օրվա ընթացքում, եթե Բաքուն քաղաքական կամք դրսևորի։

«Այսօր նոյեմբերի 28-ն է, կարելի է գալիք 15 օրվա ընթացքում խաղաղության պայմանագիրը կնքել, եթե Ադրբեջանի իշխանությունն, իրոք, քաղաքական կամք դրսևորի։ Կարելի է ասել, որ սկզբունքային գրեթե բոլոր հարցերի շուրջ եկել ենք համաձայնության։ Չեմ ուզում հավելյալ մանրամասներ ասել ու դրանով վնասել գործընթացին»,-ասել է նա, հայտնում է Aysor.am-ը։

Սիմոնյանի խոսքով՝ խաղաղության պայմանագիրը հիմնված է միջազգային սկզբունքների վրա։

ԱԺ նախագահն ասել է, որ հայկական կողմը խաղաղության պայմանագրի վերաբերյալ որևիցե հանդիպումից չի հրաժարվել, հրաժարվել է ադրբեջանական կողմը։

«Գալու է մի ժամանակ, հույս ունեմ, մենք ամեն ինչ անելու ենք, երբ հայերն ու ադրբեջանցիները պետք է ապրեն կողք-կողքի, առևտուր անեն», - ասել է Սիմոնյանը, հայտնում է Panorama.am-ը։

Նա չի բացառում, որ ինչ-որ մարդիկ կվերադառնան Ադրբեջանի տարածք իրենց տները, ինչ-որ ժամանակ անց ադրբեջանցիները գան և այստեղ բնակություն հաստատեն։

Հարցին՝ խաղաղության պայմանագրի մեջ ներառվա՞ծ է նման կետ, Սիմոնյանն ասել է, որ ինքը այդպիսի կետ չի նկատել։

«Խաղաղության պայմանագիրն ամբողջովին հիմնված է միջազգային սկզբունքների վրա՝ տարածքային ամբողջականության, կոմունիկացիաների բացման և այլն»,- նշել է Սիմոնյանը։

Ադրբեջանը չի մասնակցել Գրանադայում կայացած հնգակողմ հանդիպմանը, հրաժարվել է մասնակցել Բրյուսելում կայանալիք բանակցություններին։ Նոյեմբերի 16-ին Ադրբեջանի ԱԳՆ–ն հայտարարել է, թե Բաքուն հրաժարվում է Հայաստանի և Ադրբեջանի արտգործնախարարների վաշինգտոնյան հանդիպումից:

Նոյեմբերի 21–ին Ադրբեջանի ԱԳՆ-ն կոչ է արել Հայաստանին խաղաղության գործընթացը քննարկելու համար հանդիպում անցկացնել սահմանին։ Ի պատասխան՝ հայկական կողմն առաջարկել էր սահմանազատման հանձնաժողովների նիստ անցկացնել պետական սահմանին։Ըստ նախնական պայմանավորվածության՝ նոյեմբերի 30-ին ՀՀ և Ադրբեջանի պետական սահմանին տեղի կունենա երկու երկրի միջև պետական սահմանի սահմանազատման պետական հանձնաժողովի հերթական հանդիպումը։

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---