Հայաստանն ու Իրանն աշխատում են Արաքս գետի վրայով նոր կամրջի կառուցման նախագծի վրա։ Այդ մասին hայտնել է ՀՀ տարածքային կառավարման և ենթակառուցվածքների փոխնախարար Քրիստինե Ղալեչյանը, տեղեկացնում է Spuntik Արմենիան։

Նա հավելել է, որ այժմ մասնագետները տեխնիկատնտեսական ուսումնասիրություն են իրականացնում կամրջի հետագա նախագծման համար։

«Մենք պետք է ճշտենք կամրջի կառուցման տեխնիկական ցուցանիշները։ Ընդ որում, հաշվի կառնվեն գործող կամրջի պարամետրերը, մասնավորապես՝ դրա թողունակությունը», - ասել է Ղալեչյանը։

Չի բացառվում, որ նոր կամուրջը գործողին զուգահեռ կառուցվի։ Միաժամանակ փոխնախարարը կոչ է արել չշտապել և սպասել տեխնիկատնտեսական ուսումնասիրության ավարտին, որը կօգնի որոշել նոր կառույցի երկարությունը, լայնությունը, թողունակությունը և այլ պարամետրերը:

Ինչ վերաբերում է «Հյուսիս-Հարավ» ավտոմոբիլային ճանապարհի ամենահարավային հատվածի կառուցմանը՝ Իրանին սահմանակից Ագարակից մինչև Քաջարան քաղաք (32 կմ), Ղալեչյանը նշել է, որ, ամենայն հավանականությամբ, աշխատանքների ակտիվ փուլը կսկսվի 2024 թվականի փետրվարից։

«Ընկերությունը պետք է մեծ քանակությամբ տեխնիկա մոբիլիզացնի, ճամբար ստեղծի։ Մեր նախնական գնահատմամբ՝ ֆիզիկական աշխատանքները կսկսվեն 2024 թվականի փետրվարից ոչ ուշ։ Մենք սպասում ենք իրանական ընկերության աշխատանքային ծրագրին», - ասել է Ղալեչյանը։

«Հյուսիս-Հարավ» ճանապարհի ամենահարավային հատվածը կառուցում է «Աբադ Ռահան Փարս» և «Արիանա թունել Սադ» ընկերությունների իրանական կոնսորցիումը: Պայմանագիրը կնքվել է Երևանում 2023 թվականի հոկտեմբերին։ Այդ ժամանակ էլ որոշում կայացվեց ձևավորել Հայաստան-Իրան աշխատանքային խումբ՝ Արաքս գետի վրա ևս մեկ սահմանային կամուրջ կառուցելու համար։

Երկու պետությունների սահմանին գործող կամուրջը փոքր թողունակություն ունի։ Բացի այդ, անցյալ դարում ստեղծված կառույցն արդեն քայքայվել է։ Հայաստանն արդիականացնում է «Մեղրի» անցակետը՝ պատրաստելով այնտեղ ներդնել ժամանակակից տեխնոլոգիաներ, որոնք կարագացնեն բեռների զննումն ու մեքենաների բացթողումը։