Եվրոպական խորհրդի նախագահ Շառլ Միշելը ողջունել է գերիների փոխանակումը Հայաստանի ու Ադրբեջանի միջև։ Այդ մասին նա գրել է X-ի իր միկրոբլոգում։
Միշելը կոչ է արել կողմերի առաջնորդներին հնարավորինս շուտ ավարտին հասցնել խաղաղության համաձայնագրի կնքումը։
«Ուրախ ենք ողջունել աննախադեպ առաջնթացը ՀՀ և Ադրբեջանի հարաբերություններում, քանի որ կողմերը համատեղ հայտարարություն են հրապարակել։ Մասնավորապես, ողջունում ենք ձերբակալվածների ազատ արձակումը և քաղաքական երկխոսության բաց լինելը։ Կողմերի միջև երկկողմ երկխոսության հաստատումն ու խորացումը եղել է բրյուսելյան գործընթացի հիմնական նպատակը՝ այսօրվա առաջընթացն առանցքային քայլ է»,–ասվում է գրառման մեջ։
Դեկտեմբերի 7–ին հայտնի դարձավ, որ ՀՀ վարչապետի աշխատակազմը և Ադրբեջանի նախագահի վարչակազմի համատեղ հայտարարություն են տարածել, որի համաձայն Բաքուն կազատի 32, Երևանը՝ 2 զինծառայողի, կողմերը վստահության կառուցման քայլեր կձեռնարկեն։
Նշվում է, որ կողմերը համակարծիք են, որ տարածաշրջանում վաղուց սպասված խաղաղության հասնելու պատմական հնարավորություն կա: Երկու պետությունները վերահաստատում են ինքնիշխանության և տարածքային ամբողջականության սկզբունքների հարգման հիման վրա հարաբերությունները կարգավորելու և խաղաղության պայմանագրի կնքմանը հասնելու իրենց մտադրությունը:
