Հայաստանը և Հունաստանը ռազմատեխնիկական համագործակցության համաձայնագիր են կնքել: Այն ստորագրել են պաշտոնական այցով Հունաստանում գտնվող ՀՀ պաշտպանության նախարար Սուրեն Պապիկյանը և Հունաստանի ազգային պաշտպանության նախարար Նիկոլաոս Դենդիասը։
Հանդիպման ընթացքում նրանք քննարկել են հայ-հունական պաշտպանական գործակցությանն առնչվող հարցեր։
Երկուստեք արձանագրվել է գործակցության զարգացման մեծ ներուժը, պայմանավորվածություն է ձեռք բերվել այն զարգացնել նոր թափով՝ ներառելով ռազմատեխնիկական, փորձի փոխանակման, կրթական, ուսումնավարժական, մարտավարական պատրաստության և այլ ուղղություններ։
Պաշտպանության նախարարները հանդես են եկել մամուլի համար համատեղ հայտարարությամբ։