Երևանում, Խորհրդային Միության հերոս Գևորգ Վարդանյանի անվան 192 դպրոցի բակում, բացվել է լեգենդար հետախույզ Գևորգ Վարդանյանի բրոնզաձույլ կիսանդրին։
Հանդիսավոր արարողությանը ներկա էին հայ-ռուսական միջկառավարական խորհրդի համանախագահներ, ՀՀ ԱԺ փոխխոսնակ Հակոբ Արշակյանն ու ՌԴ Դաշնային խորհրդի փոխնախագահ Յուրի Վորոբյովը, ինչպես նաև պատգամավորներ, դիվանագետներ ու հասարակական կազմակերպությունների ներկայացուցիչներ, հայտնում է Aysor.am-ը։
Կիսանդրու բացումը պայմանավորված էր Վարդանյանի հարյուրամյակով։ Հնչել են Հայաստանի և Ռուսաստանի հիմները։
Բացման արարողությունից հետո դպրոցում անցկացվել է հուշ ցերեկույթ՝ նվիրված հերոսի 100-ամյակին։
Գևորգ և Գոհար Վարդանյանները Խորհրդային Միության հերոսներ, լեգենդար հետախույզներ են։ Գոհար Վարդանյանը 16 տարեկանում ընդգրկվել էր իր ապագա ամուսնու հակաֆաշիստական խմբում։ 1943 թվականին այդ խումբն ապահովում էր Թեհրանի խորհրդաժողովի մասնակիցների անվտանգությունը։ 1951-ին Վարդանյան ամուսինները տեղափոխվել են ԽՍՀՄ, բայց ևս երեք տասնամյակ աշխատել են աշխարհի տարբեր երկրներում և միայն 1986-ին են վերադարձել հայրենիք։
1984 թվականին Գևորգ Վարդանյանին Խորհրդային Միության հերոսի կոչում է շնորհվել: Նրա վաստակը, հետախուզական գործունեությունն առանձնացվել է բազմաթիվ շքանշաններով ու մեդալներով, ինչպես նաև ԽՍՀՄ ՊԱԿ-ի գերազանցության գլխավոր նշանով՝ «Պետանվտանգության պատվավոր աշխատակից»:
