Կիրանցում բնակիչները քանդում են գույքը՝ տարածքը հանձնելուց առաջ

PanARMENIAN.Net - Տավուշի մարզի սահմանամերձ Կիրանցում լարված իրավիճակ է։ Սահմանազատման հետևանքով ադրբեջանական կողմին անցնող չորս շինությունից մեկի վագոն-տնակի սեփականատիրոջը հորդորել են ազատել տարածքը։

Այժմ գյուղի բնակիչները փորձում են քանդել իրենց գույքը տարածքներն Ադրբեջանին հանձնելուց առաջ, հայտնում է «Փաստինֆոն»։

Բնակիչներից մեկն էլ փորձել է այրել իր հողակտորը, որը ևս պետք է անցնի Ադրբեջանին։

«Տավուշը հանուն հայրենիքի» շարժումը տեսանյութ է հրապարակել։

Վարչապետի աշխատակազմի Տեղեկատվության և հասարակայնության հետ կապերի վարչությունը, պատասխանելով սահմանազատման հարցերով Հայաստանի և Ադրբեջանի հանձնաժողովների մայիսի 15-ին հրապարակված հայտարարության մասին հարցերին, նշել է, որ Տավուշում 25 հեկտար հողերը կվերադարձվեն Կիրանցին, և որ ճանապարհի տեղափոխման խնդիր կա։ Նշվել է նաև, որ սահմանապահները կկանգնեն սահմանազատված հատվածում 8-9 օրվա ընթացքում, իսկ Կիրանցի զգայուն հատվածում՝ ավելի ուշ։

Մինչդեռ կիրանցեցիները դժգոհ են պայմանավորվածությունից։ Նրանք տարակուսած են, թե ինչո՞ւ է վարչապետի աշխատակազմը որպես նպաստավոր լուր արձանագրել, թե Կիրանցին վերադարձվում է մոտ 25 հեկտար գյուղատնտեսական նշանակության հող, այն դեպքում, որ այդ ականապատ հողերը միշտ են եղել հայկական վերահսկողության տակ։