Փաշինյանն այցելել է Սարդարապատի հուշահամալիր

PanARMENIAN.Net - Վարչապետ Նիկոլ Փաշինյանն այցելել է Սարդարապատի հուշահամալիր։

«Հանրապետության տոնի առթիվ ՀՀ բարձրագույն ղեկավարության հետ այցելել եմ Սարդարապատի հուշահամալիր», - գրել է նա ֆեյսբուքյան իր էջում։

Նախագահ Վահագն Խաչատուրյանի, վարչապետ Նիկոլ Փաշինյանի, Ազգային ժողովի նախագահ Ալեն Սիմոնյանի, օրենսդիր, գործադիր, դատական իշխանության այլ ներկայացուցիչների մասնակցությամբ Սարդարապատի հուշահամալիրում տեղի է ունեցել հանդիսավոր միջոցառում՝ նվիրված Հանրապետության օրվան, հայտնում է Արմենպրեսը։

Միջոցառման մեկնարկին վարչապետ Նիկոլ Փաշինյանը ելույթ է ունեցել, որին հաջորդել է հանդիսավոր զորահանդեսը։

Իր ելույթում Փաշինյանն ասել է, որ ՀՀ-ն մարդու պետություն է և պետք է ծառայի մարդուն։

«Բայց սա մի նպատակ է, որ հեշտ չի տրվում, այն անցնում է փշերի ու որոգայթների, ծանր ու դժվար որոշումների, հիասթափությունների ու չհասկացվածության միջով, բայց դա ուղիղ ճանապարհ է, և մենք անցնում ենք այդ ճանապարհը ու մենք հասնելու ենք մեր ավետյաց երկրին, մեր ավետյաց հանրապետությանը»,-ասել է նա։

Զորահանդեսից հետո Հայաստանի նախագահ Վահագն Խաչատուրյանը, վարչապետ Նիկոլ Փաշինյանը և Ազգային ժողովի նախագահ Ալեն Սիմոնյանը ծաղկեպսակ են դրել Սարդարապատի ճակատամարտի հերոսների հիշատակը հավերժացնող հուշակոթողին և հարգանքի տուրք մատուցել նրանց հիշատակին:

Մայիսի 28–ին Հայաստանում և ամբողջ աշխարհում հայերը տոնում են Առաջին Հանրապետության օրը։ 1918-ի մայիսին Սարդարապատի, Բաշ-Ապարանի և Ղարաքիլիսայի հերոսամարտերի արդյունքում, հայ ազգը, համախմբելով բոլոր ուժերը, դարեր անց կարողացավ վերականգնել պետականությունը:

Սովորաբար ՀՀ վարչապետն ու կառավարության անդամները Սարդարապատ են այցելում առավոտյան, սակայն, առավոտյան այնտեղ էին «Տավուշը հանուն հայրենիքի» շարժման աջակիցները Բագրատ սրբազանի առաջնորդությամբ, որոնք մայիսի 27–ին էին ավտոերթով եկել Սարդարապետ և այնտեղ էին գիշերել։