ՀԱՊԿ․ ՀՀ–ն շարունակում է լինել կառույցի լիիրավ անդամ

PanARMENIAN.Net - ՀԱՊԿ քարտուղարությունը, մեկնաբանելով ՀՀ վարչապետ Նիկոլ Փաշինյանի հայտարարությունը կազմակերպությունից դուրս գալու հավանականության մասին, նշել է, որ ՀՀ–ն շարունակում է լինել ՀԱՊԿ լիիրավ անդամ։

«Ելնում ենք նրանից, որ, չնայած ՀՀ մասնակցության զգալի կրճատմանը ՀԱՊԿ միջոցառումներին, Երևանը շարունակում է մնալ կազմակերպության լիիրավ անդամ»,–ասել են ՀԱՊԿ քարտուղարությունից, գրում է ՏԱՍՍ–ը։

Այնտեղ նաև ուշադրությունը հրավիրել են ԱԳ նախարար Արարատ Միրզոյանի այն պարզաբանմանը, որ Փաշինյանը նկատի չի ունեցել, թե ՀՀ–ն դուրս է գալիս ՀԱՊԿ–ից։

Արարատ Միրզոյանը հունիսի 12–ին ԱԺ–ում հայտարարել է, որ ՀՀ վարչապետ Նիկոլ Փաշինյանը չի ասել, թե Հայաստանը դուրս է գալիս ՀԱՊԿ–ից։ Փաշինյանը նույն օրը խորհրդարանում ակնարկել էր, որ Հայաստանը դուրս կգա ՀԱՊԿ-ից՝ ասելով, թե նախկին իշխանությունները մտել էին «փուչիկ դաշինք», իսկ հետո պարզվել է, որ այն ոչ թե պաշտպանում է Հայաստանը, այլ պատերազմ է պլանավորում է Հայաստանի դեմ։

«Վարչապետն ասել է, որ մենք կորոշենք՝ երբ դուրս կգանք, մենք կորոշենք, բայց հետ չենք գնա՝ ոչ պակաս, ոչ էլ ավելի։ Եթե որևէ մեկը պնդում է, որ ՀՀ վարչապետն ասել է՝ Հայաստանը դուրս է գալիս ՀԱՊԿ-ից, սխալվում է»,- ասել էր Միրզոյանը։