Մեկնարկել է ՀՀ-սփյուռք համահայկական 11-րդ կրթական խորհրդաժողովը

PanARMENIAN.Net - Մեկնարկել է Հայաստան-սփյուռք համահայկական 11-րդ կրթական խորհրդաժողովը։ Աշխարհի 15 երկրի մոտ 100 պատվիրակ Հայաստանում է արտերկրում հայկական կրթօջախներում առկա խնդիրները քննարկելու համար:

Սփյուռքից ժամանած ներկայացուցիչների խորհրդաժողովն անցկացվում է Աղվերանում և կտևի մինչև օգոստոսի 9-ը:

ՀՀ ԿԳՄՍ նախարարի տեղակալ Արթուր Մարտիրոսյանը, կարևորելով նման հանդիպումների իրագործումը Հայաստան-Սփյուռք կապն ամրապնդելու և զարգացնելու առումով, ընդգծել է, որ երկամյա պարբերականությամբ Հայաստանում գումարվող խորհրդաժողովի նպատակն է քննարկել արտերկրում հայկական կրթօջախների առկա հիմնահարցերը, հստակեցնել կրթության ոլորտում ՀՀ կրթության, գիտության, մշակույթի և սպորտի նախարարության կողմից իրականացվող ծրագրերը և համագործակցության զարգացման հաջորդական քայլերը, հայտնում է Արմենպրեսը։

«Սա շատ լուրջ ու կարևոր հարթակ է սփյուռքի կրթական գործընթացի կազմակերպիչների հետ երկխոսության մեջ մտնելու և նրանց միմյանց հետ կապելու տեսակետից: Այս համաժողովը գործող մարտահրավերներին և ծագող խնդիրներին լուծում տալու, հասցեագրելու լավագույն եղանակն է: Այս տարվա կարևոր շեշտադրումներից մեկն այն է, որ մենք գտնվում ենք կրթական լայնածավալ բարեփոխումների փուլում, և խնդիր կա, որպեսզի սփյուռքի կրթական ծրագրերը հնարավորինս համադրելի լինեն հանրակրթական պետական չափորոշչին: Երկրորդ՝ մենք միացել ենք ՅՈՒՆԵՍԿՕ-ի «Փոխակերպվող կրթություն 2030» օրակարգին և կարիք կա, որպեսզի սփյուռքում կրթությունը ևս լինի ժամանակի շնչին և Հայաստանում իրականացվող կրթական բարեփոխումներին համահունչ»,- նշել է փոխնախարարը:

Մարտիրոսյանի խոսքով՝ այս տարվա խորհրդաժողովի լիազումար նիստերում նախատեսված են զեկույցներ «Ակադեմիական քաղաք» նախաձեռնության, Հանրակրթության նոր չափորոշչի և դասագրքերի, ՀՀ պետական լեզվաքաղաքականության, սփյուռքի ուսուցիչների վերապատրաստումների ծրագրերի և այլ խնդիրների վերաբերյալ:

Պատվիրակները կներկայացնեն իրենց համայնքներում կրթության կազմակերպման գործի ներկա վիճակը, ձեռքբերումները, մեթոդական նորարարությունները, հայագիտական կենտրոնների գործունեությունը:

Համահայկական կրթական խորհրդաժողովը անցկացվում է երկու տարին մեկ անգամ, որին մասնակցում են Սփյուռքի համայնքներում ազգային կրթության և դաստիարակության խնդիրներով զբաղվող մարմինների, կազմակերպությունների, հաստատությունների ներկայացուցիչներ, հայագետներ, համայնքների ներկայացուցիչներ, կրթօջախների հոգաբարձուների խորհրդի անդամներ, տնօրեններ, ուսուցիչներ: