Ուղեվարձի համար չվճարողները կտուգանվեն՝ մշակվելու են իրավական լուծումներ

PanARMENIAN.Net - Նոյեմբերի 1-ից հասարակական կարգի պահպանության ծառայության կողմից սահմանվել է ընթացիկ հսկողություն՝ Երևանի հասարակական տրանսպորտի շահագործման ընթացքում քաղաքացիների կողմից նշված ծառայությունից օգտվելու ժամանակ համապատասխան վճարն ըստ սահմանված ձևի կատարելու նպատակով: Այդ մասին քաղաքապետարանի գործակարգավարական խորհրդակցության ժամանակ ասել է հասարակական կարգի պահպանության ծառայության պետ Արամ Գյուլզադյանը:

Ստուգումներով արձանագրվել է, որ հիմնականում խնդիրներ են առաջանում մանրադրամի, վալիդատորների, ինչպես նաև վարորդների կողմից առանց համապատասխան վճարի ուղևորափոխադրումներ կազմակերպելու պատճառով»,- ասել է նա, հայտնում է Factor.am-ը։

Քաղաքապետ Տիգրան Ավինյանն ասել է, որ մշակվելու են իրավական լուծումներ, որպեսզի միասնական տոմսային համակարգի ամբողջական ներդրումից հետո առանց համապատասխան վճարի ուղևորափոխադրման պարագայում ծառայությունը կարողանա վարչարարություն իրականացնել:

Նոյեմբերի 1-7-ն ընկած ժամանակահատվածում 2 մլն 131 հազար 746 ուղևորից 578 հազար 22-ը օգտվել է տոմսային համակարգից: Նախորդ շաբաթվա համեմատ «Երևանի ավտոբուս» ՓԲԸ-ի հասույթն ավելացել է 24 մլն 700 հազար դրամով: Միասնական տոմսային համակարգի ներդրումը սպասվում է հունվարի 1-ից: