Լավրով․ ՀԱՊԿ–ից դուրս գալու փաստաթուղթ ՀՀ–ից չի ստացվել

PanARMENIAN.Net - ՌԴ ԱԳ նախարար Սերգեյ Լավրովը, մեկնաբանելով ՀՀ վարչապետ Նիկոլ Փաշինյանի հայտարարությունը, թե Հայաստանի և ՀԱՊԿ-ի հարաբերություններն անցել են անդառնալիության կետը, ասել է, որ ՀԱՊԿ–ից դուրս գալու փաստաթուղթ ՀՀ–ից չի ստացվել։

«Այդպիսի փաստաթուղթ չի ստացվել։ Մենք լսում ենք այդ խոսակցությունները, Հայաստանի վարչապետը խորհրդարանում շատ է խոսել ու քննարկել այդ թեման։ Մենք ոչ մեկին ոչինչ չենք պարտադրում։ Մենք վստահ ենք, որ Հայաստանի անվտանգության շահերից է բխում անդամակցությունը ՀԱՊԿ–ին առավելագույնս օգտագործելը», - ասել է նա, հայտնում է ՏԱՍՍ–ը։

Նա հավելել է, որ եթե նման որոշում կայացվի, դա կլինի ՀՀ ղեկավարության ինքնիշխան իրավունքը։

«Եթե նման որոշում կայացվի, որի մասին նա խոսել է որպես կանխորոշված մի բանի, դա կլինի Հայաստանի ներկային ղեկավարության ինքնիշխան իրավունքը։ ՌԴ–ն և ՀԱՊԿ մյուս անդամները ոչ մի գործողություն, որը կարող է ընկալվել որպես Երևանի առջև դռները փակելու գործողություն, չեն ձերնարկել և մտադիր չեն ձեռնարկել»,–ասել է Լավրովը։

ՀՀ վարչապետ Նիկոլ Փաշինյանն Ազգային ժողովում կառավարության հետ հարցուպատասխանի ժամանակ հայտարարել է, որ Հայաստանն իրեն ՀԱՊԿ–ից դուրս է համարում և որ, իր կարծիքով, անդառնալիության կետն արդեն անցել ենք։ Նա ասել է նաև, որ ՀԱՊԿ-ի հետ Հայաստանի հարաբերությունների սառեցման իրավիճակն Արցախի հետ կապ չունի:

Մինչդեռ, Երևանը 44-օրյա պատերազմի ընթացքում նման ակնկալիքներ չի ունեցել ՀԱՊԿ-ից, հայկական կողմը հայկական կողմը ՀԱՊԿ-ից ռազմական օգնություն է խնդրել 2022 թվականին ՀՀ ինքնիշխան տարածքի նկատմամբ ադրբեջանական հարձակման ընթացքում։