Արգիշտի Քյարամյանը հիմնել է իրավաբանական ծառայությունների ընկերություն

PanARMENIAN.Net - Քննչական կոմիտեի նախկին նախագահ Արգիշտի Քյարամյանը հիմնադրել է մասնավոր ընկերություն, որը մատուցելու է իրավաբանական և հաշվապահական ծառայություններ, հայտնում է Iravaban.net-ը։

Ընկերությունը ստացել է Legal and Tax Consulting անվանումը։ Այն առաջարկում է իրավական գործընթացների ամբողջական կազմակերպում, խորհրդատվություն, դատական ներկայացուցչություն, ինչպես նաև աջակցություն այլ իրավաբանական ու հաշվապահական խնդիրների լուծման հարցում։

Ընկերությունը նախատեսում է ծառայություններ տրամադրել քաղաքացիական, վարչական և քրեական իրավունքի ոլորտներում՝ ներառելով հարկային ու տնտեսական հանցագործությունների վերաբերյալ քրեական վարույթների շրջանակը։

Ըստ ընկերության կանոնադրության՝ քրեական իրավունքի շրջանակում փաստաբանական ծառայությունները կվերաբերեն բացառապես 2024 թ. նոյեմբերի 20-ից հետո սկսված քրեական վարույթներին՝ այսինքն Արգիշտի Քյարամյանի ՀՀ քննչական կոմիտեի նախագահի պաշտոնից ազատումից հետո։

Ընկերությունից հաստատել են այս տեղեկատվությունը՝ ընդգծելով, որ իրենց առաքելությունն է ստեղծել վստահելի ծառայություններ մատուցող կազմակերպություն, որը կնպաստի գործընկեր կազմակերպությունների իրավական, հաշվապահական և հարկային խնդիրների լուծմանը և կպաշտպանի նրանց իրավունքները տարբեր ատյաններում։

Արգիշտի Քյարամյանը Քննչական կոմիտեի նախագահի պաշտոնից ազատվել է 2024 թ. նոյեմբերի 20-ին, ի թիվս մի քանի այլ բարձրաստիճան պաշտոնյաների, որոնց գործունեությունից դժգոհել էր վարչապետ Նիկոլ Փաշինյանը։