Հունիսի 5-ին Երեւանի Մոսկվա կինոթատրոնում Բնության համաշխարհային հիմնադրամի (WWF) հայկական մասնաճյուղի նախաձեռնությամբ եւ Հայաստանի Բնապահպանության նախարարության աջակցությամբ տեղի կունենա որսագողության մասին փաստագրական ֆիլմի շնորհանդես, ինչպես նաեւ Հայաստանի բնության լուսանկարների ցուցահանդես:

Ցուցահանդեսը եւ ֆիլմի պրեմիերան նվիրված են շրջակա միջավայրի պահպանության Միջազգային օրվան:

Բացմանը մասնակցելու են երկրի մի քանի նախարարությունների, տարածքային իշխանությունների, հասարակական կազմակերպությունների ներկայացուցիչներ:

WWF-ն աշխարհի խոշորագույն հասարակական բարեգործական կազմակերպություններից է, հիմնադրվել է 1961-ին: Հիմնադրամի ավելի քան 5000 աշխատակիցներ աշխատում են 100 երկրներում: Ամեն տարի WWF-ն իրականացնում է ավելի քան 1200 տնտեսական նախագծեր: Գլխավոր նպատակը` Երկրի կենսաբանական բազմազանության պահպանումն է:

WWF-ն Երեւանում գործում է արդեն 8 տարի: