Ներքին գործերի նախարարությունը հորդորել է զգոն լինել հանրային վայրերում անվճար Wi-Fi ցանցերից օգտվելուց, ինչը «հարմար է, բայց ոչ ապահով»։

«Հանրային Wi-Fi ցանցերում փոխանցվող տեղեկատվությունը հաճախ անպաշտպան է, և կիբեռհանցագործները կարող են որսալ ձեր տվյալները, օրինակ՝ մուտքագրած գաղտնաբառերը, բանկային տվյալները և այլն»,– ասված է հայտարարությունում։

ՆԳՆ մասնագետները մատնանշել են մի քանի կարևոր քայլ, որոնք օգտակար են հանրային ցանցերից անվտանգ օգտվելու համար․

• Խուսափել բանկային հավելված մուտք գործելուց,
• Չկատարել առցանց գնումներ,
• Գործածել VPN ծառայություններ,
• Անջատել ֆայլերի փոխանակման գործառույթները (AirDrop, File Sharing, Bluetooth և այլն),
• Հետևել Wi-Fi ցանցերի պահպանված ցանկին և հեռացնել նախկինում միացված բաց ցանցերը։

Իրավապահ մարմինները խորհուրդ են տալիս նաև անջատել Wi-Fi-ն այն պահին, երբ այլևս անհրաժեշտ չէ։

«Հանրային Wi-Fi-ը հարմար է, բայց ոչ ապահով»,–ասվում է հայտարարության մեջ։