ՀՀ սննդամթերքի անվտանգության տեսչական մարմնի անասնաբուժության վարչության տեսուչներն անասնահամաճարակային մշտադիտարկման շրջանակում այց են իրականացրել Շիրակի մարզի Արդենիս գյուղում գործող «Արփի Լենդ» ՍՊԸ-ին պատկանող սպանդանոց։

Ստուգման արդյունքում պարզվել է՝ արտադրական տարածքն աշխատել է իրավական ակտերով սահմանված սանիտարահիգիենիկ պահանջների խախտումներով։

Մասնավորապես՝

• շինության հատակները գտնվել են վնասված վիճակում և չեն պատրաստվել լվացվող ու ախտահանվող նյութերով,
• պատերի մի շարք հատվածներում հայտնաբերվել են կոտրվածքներ, վնասվածքներ և անհարթություններ,
• առաստաղը ևս եղել է անբավարար վիճակում, գրանցվել են կեղտի կուտակումներ ու մասնիկների թափվելու հավանականություն։

Տեսչական մարմնի ղեկավարի որոշմամբ, սպանդանոցի արտադրական գործունեությունն անմիջապես կասեցվել է։ Միևնույն ժամանակ սահմանվել է ժամանակահատված՝ արձանագրված խախտումները վերացնելու համար։