Հայ-թուրքական «Ակոս» թերթի գլխավոր խմբագիր Հրանտ Դինքի սպանության գործով 5 հայց է ներկայացվել Մարդու իրավունքների եվրոպական դատարան: Ինչպես նշել է Հրանտ Դինքի միջազգային հիմնադրամի փաստաբան Դենիզ Թունան, ներկայացված հայցերը վերաբերում են Մարդու իրավունքների եվրոպական կոնվենցիայի դրույթներին, մասնավորապես, կյանքի իրավունքին, խոսքի ազատությանը, արդար դատավարությանը: Դինքի սպանությունից հետո, նրա ընտանիքի փաստաբանները դիմել են ECHR, քանի որ Տրաբզոնի ու Ստամբուլի ոստիկանները չկանգնեցին դատարանի առջեւ: Վերջիններս մեղադրվում են նրանում, որ տեղեկություններ ստանալով «Ակոս» թերթի խմբագրապետի նախապատրաստվող սպանության մասին, ոչինչ չեն ձեռնարկել: Մյուս հայցը կապված է նրա հետ, որ չի պատժվել նաեւ Սամսունի ոստիկանը, որը լուսանկարվել էր Դինքի գործով կասկածյալ Օգյուն Սամաստի հետ, հաղորդում է bianet-ը:

Հրանտ Դինքը սպանվել է 2007թ. հունվարի 19-ին Ստամբուլում` «Ակոս» թերթի խմբագրության մուտքի մոտ: Ընդամենն այդ գործով ձերբակալվել է 18 մարդ, հիմնականում Տրաբզոնից: Հանցագործությունը կազմակերպելու մեղադրանք է ներկայացվել այդ թվում նաեւ 26-ամյա Յասին Հայալին, որը Սամաստին միջոցներ եւ զենք է տրամադրել: Հուլիսի 6-ին տեղի կունենա այդ գործի թվով 10-րդ լսումը: