Արթուր Աբրահամը պաշտպանել է աշխարհի չեմպիոնի տիտղոսը Մահիր Օրալի հանդեպ տեխնիկական նոկաուտով

29 հունիսի 2009 - 12:05 AMT

PanARMENIAN.Net - Գերմանիան ներկայացնող հայ բռնցքամարտիկ, IBF վարկածով միջին քաշային կարգում աշխարհի չեմպիոն Արթուր Աբրահամը (մինչեւ 72,1 կգ) հաջողությամբ պաշտպանեց իր տիտղոսը` նոկաուտի ենթարկելով Գերմանիան ներկայացնող թուրք մարզիկ Մահիր Օրալին: Մենամարտը տեղի ունեցավ Բեռլինի «Max-Svhmelling-Halle»-ում հունիսի 27-ին:

Մենամարտի մեկնարկը հաջող էր հավակնորդի համար, որը, ստանձնելով առաջատարի դերը, կարողացավ մի քանի հաջող պահեր ստեղծել: Սակայն Օրալի նախաձեռնությունը մարեց չորրորդ ռաունդից հետո, երբ Աբրահամն առաջին անգամ նոկդաունի ենթարկեց իր մրցակցին: Նույն սցենարը կրկնվեց 6-րդ ռաունդում եւ հերթական անգամ Աբրահամի հզոր հարվածը ծնկի բերեց թուրք բռնցքամարտիկին: Մինչ 9-րդ փուլը Օրալը դժվարությամբ ոտքի վրա մնաց: Հանգուցալուծումը վրա հասավ 10-րդ ռաունդում, երբ աշխարհի չեմպիոնի մի շարք ջախջախիչ հարվածների արդյունքում Օրալը սեփական նախաձեռնությամբ ծնկի իջավ, իսկ հետո կանգնեց եւ որոշեց շարունակել դիմակայությունը, նրա մարզիչ Հանս-Յուրգեն Ուայթը սրբիչը ռինգ նետեց` հրաժարվելով մենամարտը շարունակելուց: Աբրահամը հաղթեց տեխնիկական նոկաուտով:

Այդպիսով, «արքա» Արթուրը հաջողությամբ պաշտպանեց իր տիտղոսն արդեն 10-րդ անգամ, միաժամանակ 30-րդ հաղթանակը տանելով պրոֆեսիոնալ ռինգում, որոնցից 24-ը` նոկաուտով:

Սա Օրալի 29-րդ մենամարտն էր պրոֆեսիոնալ ռինգում եւ երկրորդ պարտությունը: Նա 25 հաղթանակ ունի, որոնցից 10-ը նոկաուտով եւ 2 ոչ ոքի:

Աբրահամի գլխավոր նպատակը շարունակում է մնալ WBC/WBO չեմպիոն Քելլի Պավլիկի հետ հանդիպումը, որի հետ մենամարտելուց հետո հայ բռնցքամարտիկը մտադիր է տեղափոխվել հաջորդ քաշային կարգ:

Հարկ է նշել, որ այս գիշեր դահլիճում ներկա էր նաեւ անցյալում հայտնի ֆուտբոլիստ, աշխարհի եւ Եվրոպայի չեմպիոն Լոտար Մատտեուսը: