ԼՂՀ փորձագետների խորհուրդը կոչ է արել Հայաստանի քաղաքացիական հասարակությանը պաշտպանել արցախյան գործընկերների դիրքորոշումը

PanARMENIAN.Net - ԼՂՀ փորձագետների խորհուրդը եւ գործընկերային կազմակերպությունները հանդես են եկել հայտարարությամբ: PanARMENAIN.Net ստացված փաստաթղթում մասնավորապես նշվում է, որ ԼՂՀ քաղաքացիական հասարակության ներկայացուցիչները, որոնք շահագրգռված են տարածաշրջանում խաղաղություն հաստատելու մեջ, եւս մեկ անգամ մեր պատրաստակամությունն ենք հայտնում լինել իսկապես խաղաղապահ նախաձեռնությունների ակտիվ մասնակիցները, եւ չենք տեսնում համաձայնության եւ բարիդրացիական հարաբերությունների ձեռք բերման այլ ճանապարհներ:



«ԼՂՀ քաղաքացիական հասարակության ներկայացուցիչների մասնակցությունը International Alert-ի կողմից անցկացվող Հասարակական ֆորումներին ի պաշտպանություն ԵԱՀԿ ՄԽ հովանու ներքո պաշտոնական խաղաղապահական գործընթացին մենք ոչ նպատակահարմար ենք համարում, քանի որ մինչեւ այժմ չեն հրապարակվել այսպես կոչված «մադրիդյան սկզբունքները», որոնց հիման վրա կառուցվում է խաղաղպահական գործընթացը. ԵԱՀԿ ՄԽ համանախագհաների կողմից ԼՂՀ քաղաքացիական հասարակությանը ներկայացված եւ վերջերս «Ռոսսիա» հեռուստաալիքի եթերում Ադրբեջանի նախագահի կողմից հաստատված կարգավորման սխեման հակասում է Լեռնային Ղարաբաղի Հանրապետության եւ ՀՀ արմատական շահերին: ԼՂՀ քաղաքացիական հասարակության ներկայացուցիչները չեն կարող պաշտպանել այն գործընթացները, որոնք չեն նպաստում արդար խաղաղության ձեռք բերմանը, այլ ավելի շատ ուղղված են իրավիճակի ապակայունացմանը, ինչպես ղարաբաղյան հակամարտության տարածաշրջանի երկրներում, այնպես էլ այդ երկրների միջեւ: Մենք դիմում ենք ՀՀ քաղաքացիական հասարակության առաջնորդներին` կոչ անելով պաշտպանել արցախյան գործընկերների դիրքորոշումը»,- ասվում է հայտարարության մեջ: