Անձը ոչինչ չի փոխում, ԵԱՀԿ ՄԽ նոր համանախագահը ընդամենը կատարում է իր ղեկավարության հանձնարարականները: Այդ մասին PanARMENIAN.Net-ի թղթակցի հետ զրույցում հայտարարել է ԼՂՀ ԱԺ արտաքին հարաբերությունների մշտական հանձնաժողովի նախագահ Վահրամ Աթանեսյանը` մեկնաբանելով ԵԱՀԿ Մինսկի խմբի նոր ամերիկացի համանախագահի պաշտոնում Ռոբերտ Բրադտկեի նշանակումը: Ըստ նրա, Բրադտկեն բավական հետաքրքիր ֆիգուր է, քանի որ անցյալում նա աշխատել է բալկանյան երկրներում, ինչպես նաեւ զբաղվել է Կոսովոյի հարցով: «Եթե ղարաբաղյան հարցում նա նույն դիրքորոշումն որդեգրի, ինչ Կոսովոյի հարցում, ապա նրա նշանակությունը կարող է բավական արդյունավետ լինել մեզ համար»,-ասել է Վ.Աթանեսյանը: Նա նաեւ նշել է, որ ԱՄՆ-ն շահագրգիռ է ղարաբաղյան հակամարտության կարգավորման մեջ, քանի որ առանձնակի հետաքրքրություն ունի տարածաշրջանի հանդեպ:

Աթանեսյանը նաեւ մեկնաբանել է ԵԱՀԿ ՄԽ ռուսաստանցի համանախագահի պաշտոնում ՌԴ փոխարտգործնախարար Գրիգորի Կարասինի հնարավոր նշանակումը` ասելով, որ այս քայլով Մոսկվան ցանկանում է բարձրացնել իր ներկայացուցչության մակարդակը ԵԱՀԿ ՄԽ-ում: