Սերժ Սարգսյան. Սեպտեմբերի 21-ը տոն է, որի մասին երազել են հայ ժողովրդի բոլոր սերունդները

PanARMENIAN.Net - Սեպտեմբերի 21-ը տոն է, որի փափագն ու զգացողությունը իրենց հոգում կրել են հայ ժողովրդի բոլոր սերունդները: Ես ընդգծում եմ` բոլոր սերունդները` առանց բացառության, ասել է ՀՀ նախագահ Սերժ Սարգսյանը` ելույթ ունենալով ՀՀ անկախության հռչակման 18-րդ տարեդարձին նվիրված ընդունելության ժամանակ:



«Անկախ այն բանից` ճակատամարտն Արածանիի ափին էր, Ավարայրի, թե Ձիրավի դաշտավայրերում, Կիլիկիայի բերդերի վրա, Վանի պարիսպների տակ, Սարդարապատում, թե Շուշիում, մեզ առաջնորդել է նույն տեսիլքը: Անկախ այն բանից` վանական մենաստանում ձեռագիր ենք ծաղկել, թե մաշտոցյան տառեր ձուլելով` գիրք ու հանդես հրատարակել Վիեննայից մինչեւ Կալկաթա, Էջմիածնից մինչեւ Վենետիկ, մեզ առաջնորդել է նույն տեսիլքը: Անկախ այն բանից` հայը հաջողության հասած վաճառական էր, ում սեփական նավատորմը աշխարհի օվկիանոսներն էր չափում, թե սովահար ու նվաստացված տարագիր, ում ողջակիզում էին Դեր Զորի անապատում, նրան առաջնորդում էր նույն տեսիլքը: Անկախ այն բանից, թե աշխարհի քարտեզի վրա մենք որքան տարածք ենք զբաղեցրել, կամ թե ընդհանրապես ջնջված ենք եղել այդ քարտեզից, միեւնույն է, մեզ առաջնորդել է նույն տեսիլքը` Անկախ Հայաստանի տեսիլքը, որ մարմնավորում է ազատությունը, մարդկային ու ազգային արժանապատվությունը եւ վերջապես` բարին ու գեղեցիկը արարելու իրավունքն ու պատմական հնարավորությունը»,-ասել է նա:



«18 տարի առաջ այս օրը համաժողովրդական հանրաքվեի ժամանակ միլիոնավոր ձեռքեր ուղղվեցին դեպի քվեատուփերը` «Այո» ասելու համար: Հետո այդ նույն ձեռքերը բռնեցին միմյանց, եւ ձեռք ձեռքի տված մենք անցանք մեծ ու փոքր փորձությունների միջով, դիմագրավեցինք եւ շարունակում ենք դիմագրավել մեծ ու փոքր մարտահրավերների: Բայց ամենակարեւոր ընտրությունն արդեն արված է: Անկախությունն այլեւս մեր բախտն է ու ճակատագիրը, մեր բեռն է ու պատասխանատվությունը, մեր զենքն է ու գործիքը, մեր ուժն է եւ իրավունքը` այսուհետ անշրջելի եւ հավերժական:



Ի՞նչ է ասում միջազգային քաղաքական ասպարեզ վերադարձած Հայաստանը աշխարհին: Պարզ ու հասկանալի բաներ. խաղաղություն, կայունություն, բարիդրացիական հարաբերություններ, տնտեսական եւ այլ կարգի բազմակողմանի համագործակցություն բոլոր ուղղություններով: Մենք բավարար համբերություն եւ իմաստնություն ենք ունեցել դա ասելու նույնիսկ նրանց, ովքեր տարիներ շարունակ փորձում էին եւ հիմա էլ փորձում են մեր առաջընթացը կասեցնել ամեն տեսակ շրջափակումներով եւ հայատյաց քարոզչությամբ:



Ի՞նչ է ասում ցեղասպանության դժոխքից հարություն առած Հայաստանն իր աշխարհասփյուռ զավակներին: Պարզ ու հասկանալի բաներ. միասնություն, հավաքական կամք ու ջանք, հայության շահերն ու նպատակները պետականորեն հետապնդելու եւ պաշտպանելու վճռականություն, համայն հայության հայրենիքի նկատմամբ որդիական սեր ու նվիրում, մեր երազած Հայաստանը համատեղ ճիգերով բարձրացնելու երջանիկ հնարավորություն: Եվ ասում է. «Բարի վերադարձ հայրենի տուն»:



Ի՞նչ է ասում ամենատարբեր բռնապետությունների, խալիֆայությունների ու կայսրությունների ճիրաններից փրկված Հայաստանն իր բազմազգ քաղաքացիներին: Պարզ ու հասկանալի բաներ. ազատություն, ժողովրդավարություն, իրավական պետություն, քաղաքացիական հասարակություն, եվրոպական արժեքային համակարգ:



Նաեւ ասում է, որ տնտեսական եւ այլ կարգի ճգնաժամերը ժամանակավոր են, իսկ հայրենիքը` հարատեւ: Հայաստանի աշխատունակ եւ աշխատասեր քաղաքացիները կարող են եւ հաղթահարելու են մեր ճանապարհին հայտնված նաեւ այս խոչընդոտները: Երախտագիտությամբ ընդունելով հանդերձ այն աջակցությունը, որ այսօր ցուցաբերվում է Հայաստանին, մեր դարավոր փորձը հուշում է, որ սեփական աշխատանքն է ամենայն բարիքի հիմքը:



Ի՞նչ է ասում Հայաստանն իրեն պատերազմով սպառնացողներին: Պարզ ու հասկանալի բաներ. մենք սրեր ենք խաչել այնպիսի մեծ ու հզոր ազգերի հետ, որոնք ժամանակին աշխարհի բախտն են որոշել, բայց այսօր հիշատակվում են միայն պատմության դասագրքերում: Եվ ասում է. «Մենք պատերազմ չենք ուզում, բայց պատրաստ ենք հաղթելու»` միաժամանակ մատնացույց անելով Արցախի խնդրի խաղաղ, քաղաքական կարգավորման հնարավորությունը»,-ասել է Սարգսյանը:



Նախագահը նշել է, որ այլ-ս կայացած, ամրացած ու առնականացած հայոց պետությունը իրողություն է: «Նա հավատարիմ եւ խոսքի տեր դաշնակից է իր դաշնակիցների համար, նա հուսալի եւ խոսքի տեր գործընկեր է գործընկերների համար, նա հիմնավոր փաստարկներով բանավիճող ընդդիմախոս է ընդդիմախոսների համար: Բայց ամենից առաջ նա պայծառ արեւով ողողված ու վառ մարդկանցով լի երկիր է իր բարեկամների եւ հյուրերի համար: Նա կա, լինելու է հավերժ եւ հզորանալու է այնքան, որ դառնա մարմնացումը տեսիլքի. այն տեսիլքի, որ ունեցել են մեր բոլոր մեծերը` Խորենացուց մինչեւ Թումանյան, Կոմիտասից մինչեւ Արամ Խաչատրյան»,-ասել է Սերժ Սարգսյանը: