Հայաստանի կառավարությունը երկար ժամանակ հերքում էր ճգնաժամի ազդեցությունը երկրի տնտեսության վրա: Դեկտեմբերի 10-ին Երեւանում տեղի ունեցած մամլո ասուլիսում այս կարծիքն է հայտնել ՀՀ ԿԲ էքսնախագահ, ԵՊՀ տնտեսագիտության ֆակուլտետի դասախոս Բագրատ Ասատրյանը: «Ճգնաժամն ի հայտ եկավ 2008 թ. կեսերին, եւ արդեն երրորդ եռամսյակի արդյունքներով` Հայաստանի տնտեսական անկումը կազմում էր 20%», - ասաց նա: Նրա խոսքերի համաձայն, Հայաստանի կառավարությունը 2008 թ. ընդունեց «քայքայված բյուջե», որում 2009 թ. տնտեսական աճը դրված էր 9 %-ի մակարդակով:

ՀՀ ԿԲ էքսնախագահն ավելացրեց, որ 2009 թ. սկզբից կառավարությունը զգացմունքներով առաջնորդվելով, ընդունել էր հակաճգնաժամային քաղաքականություն, որը զուրկ էր այն իրականացնելու ստույգ միջոցներից եւ մեթոդներից, դրանցում բացակայում էին նաեւ երկարաժամկետ նախագծերը: Այդ նույն ժամանակահատվածում, ըստ նրա, սկսվեցին դրամական միջոցների փնտրտուքը, սակայն պարզվեց, որ Հայաստանը չի կարող ապահովել դրանց իրացումը: Այդ համատեքստում Բագրատ Ասատրյանը նշեց, որ Հայաստանի կառավարությունը պետք է առաջին հերթին դիմի ներքին աղբյուրներին (բանկերին եւ քաղաքացիներին) եւ փորձի իրացնել հակաճգնաժամային նախագծերը` ի հաշիվ ներքին պարտքի, հետո միայն դրանք բավարար չլինելու դեպքում` դրսից ներմուծել: «Եթե 2008 թ. մենք թեթեւ պարտքով բեռնված երկիր էինք, ապա 2009 թ. վերջին մենք կվերածվենք ծանր բեռնվածությամբ երկրի, քանի որ պետական պարտքն արդեն հասնում է 50%-ի ՀՆԱ համեմատ», - ասաց նա: