Հայաստանի խորհրդարանի արտահերթ նիստը, որի ընթացքում փոփոխություններ պետք է մտցվեին հեռահաղորդակցությունների մասին օրենքի մեջ, չի կայացել քվորումի բացակայության պատճառով: Նիստին ներկայացել են 44 պատգամավոր այն դեպքում, երբ քվորումը կազմում է 66 հոգի: Հիշեցնենք, որ ավելի վաղ պատգամավոր Արշակ Սադոյանը հավաքել էր անհրաժեշտ քանակությամբ ստորագրություններ, արտահերթ նիստ գումարելու համար: Նրա կողմից առաջարկված փոփոխությունների նախագիծը նախատեսում է արգելել հանրապետությունում րոպեավճարի կիրառումը ներքաղաքային հեռախոսազանգերի համար: Չներկայանալով նիստին` հանրապետական կուսակցության եւ Դաշնակցության ֆրակցիաները ներկայացնող պատգամավորները փաստորեն տապալել են այդ թեմայի քննարկումը: Հիշեցնենք, որ արդարադատության նախարար Դավիթ Հարությունյանի կարծիքով, օրենքում րոպեվճարրը արգելող կետ մտցնելու դեպքում, հեռահաղորդակցությունների ոլորտում մենաշնորհ ունեցող «ԱրմենՏել» ընկերությունը կարող է հայցով դիմել միջազգային դատարան ընդդեմ Հայաստանի կառավարության:
Լրատվության արտատպելու, կամ օգտագործելու դեպքում հղումը "PanARMENIAN.Net"-ի վրա պարտադիր է: