«Ջազ ենք նվագում Գարանյանի հետ» փառատոնը կլինի այնպիսին, ինչպիսին որ այն պատկերացնում էր Գեորգի Գարանյանը. փառատոնի ժամանակ կհնչեն ստեղծագործություններ ինչպես ջազ գնահատողների, այնպես էլ չպատրաստված ունկնդիրների համար: Հայտնի երաժիշտների եւ Հարավ-Արեւմտյան շրջանի սաների կատարմամբ կհնչեն ջազի դասականների` Դյուկ Էլլինգտոնի եւ Չարլի Փարքերի, Քաունթ Բեյսիի եւ Ջորջ Գերշվինի ստեղծագործությունները: Բեմ դուրս կգա նաեւ Գեորգի Գարանյանի հայտնի «Մեղեդի» համույթը:
«Հայաստանից փառատոնին ոչ ոք չի մասնակցելու: Հրավերներ չեն եղել»,- PanARMENIAN.Net-ի թղթակցի հետ զրույցում հաղորդեց ջազ-դաշնակահար Լեւոն Մալխասյանը:
«Ջազ ենք նվագում Գարանյանի հետ» երկրորդ երաժշտական փառատոնը կկայանա հունվարի 25-ին Մոսկվայում` «Մերիդիան» Մշակույթի եւ արվեստի կենտրոնի Մեծ դահլիճում, հաղորդում են ռուսական լրատվամիջոցները:
Գեորգի Գարանյանը Ռուսաստանի ժողովրդական արտիստ է, ՌԴ Պետական մրցանակի դափնեկիր, միջազգային ջազային փառատոների դափնեկիր: Նա ճանաչման էր հասել նաեւ որպես Օլեգ Լունդստրեմի անվան Պետական ջազ նվագախմբի գեղարվեստական ղեկավար ու գլխավոր դիրիժոր:
Գեորոգի Գարանյանը ներկայացնում է ռուսական ջազի հետպատերազմյան առաջին սերունդը: 1958թ. Գարանյանի սաքսոֆոնը հնչեց Օ.Լունդստրեմի նվագախմբում, իսկ հետո, 1966թ.` Համամիութենական ռադիոյի էստրադային նվագախմբում, որի ղեկավարն է Վադիմ Լյուդվիկովսկին: 1960-ականների կեսին ժամանակակից ոճով ջազային պիեսները, որ հնչում էին Համամիութենական ռադիոյով, լայն ճանաչում բերեցին Գարանյանին եւ նրա հետ հանդես եկող երաժիշտներին:
1973թ. Պետհեռուստառադիոյի նախկին նվագախմբի բազմաթիվ երաժիշտների հրավիրեցին աշխատանքի ձայնագրման «Մելոդիա» ֆիրմա: Գ.Գարանյանը դարձավ նույնանուն նվագախմբի ղեկավարը: Այն ժամանակ էլ ծնվեց այն աստեղային կազմը, որ նույն փայլով նվագակցում էր երգիչներին, ձայնագրում էր պարային երաժշտություն եւ ջազային կոմպոզիցիաներ` սվինգից մինչեւ ջազ-ռոք: «Մելոդիան» հնչում էր նաեւ կինոյում, քանի որ, ինքը` ռուսական ջազի վարպետը, երաժշտություն է գրել շուրջ 40 ֆիլմերի համար, այդ թվում նաեւ հանրահայտ «Պոկրովի դարպասները» ֆիլմի համար:
Աշխարհի լավագույն դիրիժորներից մեկի` Գենադի Ռոժդենստվենսկու հրավերով, «Մելոդիա» նվագախումբն ու Գեորգի Գարանյանը (որպես մենակատար-իմպրովիզատոր) մասնակցել են Ալֆրեդ Շնիտկեի առաջին սիմֆոնիայի պրեմիերային:
1991թ. Գարանյանն իրականացրեց իր վաղեմի երազանքը եւ ստեղծեց Մոսկվայի բիգ-բենդը, որտեղ հրավիրվեցին երկրի ամենամեծ ջազմեններն ու պրոֆեսիոնալները: Մասնագետներն ու շարքային հանդիսատեսները բազմիցս են նշել այդ նվագախմբի եզակի հնչողությունը, նրա ղեկավարությամբ արված հիանալի հնչունավորումը:
Սակայն, ինչպես խոստովանել է ինքը Գարանյանը, նա իր ամենամեծ նվաճումն էր համարում հնչունավորման դասագիրքը: Երկրի բոլոր ուսումնական հաստատություններում այդ դասագրքով սովորում են ոչ միայն ուսանողները, այլ նաեւ դասավանդողները: Ասում են, որ դասագիրքն այնպես է գրված, որ նույնիսկ երաժշիտ չլինելով, կարելի է հասկանալ, թե ինչպես նվագել: