«Ներկա պահին կառավարության նախաձեռնությամբ բանակցություններ են վարվում ՀՀ Աշխատանքային օրենսգրքում փոփոխություններ կատարելու մասին, որոնք վերաբերում են օրենսգրքի ավելի քան 109 հոդվածների: Քննարկումների ընթացքում կառավարությունն ու հանձնաժողովը համաձայնության կգան, երբ ստեղծեն Հայաստանի բնակիչների սոցիալական ապահովությանը վերաբերող առավել հասանելի ու կիրառելի օրենքներ», - մարտի 10-ին Երեւանում տեղի ունեցած մամլո ասուլիսի ժամանակ ասել է ՀՀ ԱԺ սոցիալական հարցերով մշտական հանձնաժողովի նախագահ Հակոբ Հակոբյանը:
Հակոբ Հակոբյանը գործող կենսաթոշակային համակարգը համարում է ոչ արդյունավետ, քանի որ Հայաստանի յուրաքանչյուր աշխատող քաղաքացի ապահովում է մեկ թոշակառուի կենսաթոշակը, դրանով էլ սահմանափակվում է բարձր կենսաթոշակի հնարավորությունը:
«2010 թ. Հայաստանում թոշակի գումարը նույնն է լինելու ինչ-որ 2009 թ., չնայած գազի գների բարձրացմանը (4 անձի համար` 2500 դրամ): Մենք ամեն ինչ անում ենք, որպեսզի հետագայում թոշակառուների եւ, ընդհանրապես, Հայաստանի բնակիչների համար կյանքի ավելի լավ պայմաններ ապահովենք: Սակայն ոչ ոք չի կարող իմանալ, թե ինչ կլինի մի քանի տարի հետո: Մնում է լավ սպասումների հույսով ապրել», - ավարտել է իր խոսքը Հակոբ Հակոբյանը:
Նա նաեւ ընդգծել է, որ կենսաթոշակային համակարգում փոփոխություններ մտցնելը հնարավորություն է ընձեռում Հայաստանի 40 տարեկան մարդկանց 23 տարի անց բարձր կենսաթոշակ ստանալ:
