CNN-ի Scream Bloody Murder ֆիլմն առաջ է բերել ԱՄՆ թուրքական լոբբիի անհանգստությունը

8 մարտի 2010 - 16:25 AMT

PanARMENIAN.Net - CNN հեռուստաալիքի` ցեղասպանությունների մասին պատմող Scream Bloody Murder փաստագրական ֆիլմն առաջ է բերել ԱՄՆ թուրքական լոբբիի անհանգստությունը: Թուրք-ամերիկյան ասոցիացիաների վեհաժողովի (ATAA) փոխնախագահ Ալի Ջինարը հայտարարություն է տարածել ֆիլմի հեռարձակման առիթով` բոլորին կոչ անելով բողոք արտահայտել հեռուստաալիքի դեմ:

Չինարը հայտարարել է, որ ամերիկյան հեռուստաալիքը ներկայացնում է միայն հայ համայնքի դիրքորոշումը եւ օբյեկտիվ տեղեկատվություն չի տարածում: ATAA փոխնախագահն ընդգծել է, որ CNN-ի ֆիլմը կվնասի թուրք-ամերիկյան հարաբերություններին: Նրա խոսքով, Հայոց ցեղասպանության ասոցացումը Հոլոքոստի, Ռուանդայի, Կամբոջայի եւ Դարֆուրի ցեղասպանությունների հետ մեծ անշնորհքություն է, հաղորդում է Anatolia News Agency-ն:

Մարտի 7-ին CNN հեռուստաալիքը ցուցադրեց ցեղասպանությունների մասին պատմող Scream Bloody Murder փաստագրական ֆիլմը: Փաստագրական ֆիլմում հեռուստաալիքի հայտնի լրագրող Քրիսթիան Ամանպուրը պատմում է Հայոց ցեղասպանության, Հոլոքոստի, Ռուանդայի, Կամբոջայի եւ Դարֆուրի ցեղասպանությունների, ինչպես նաեւ Իրաքում Սադդամ Հուսեյնի վարչակարգի ժամանակաշրջանում քրդերի զանգվածային գնակոծությունների մասին: Նշանակալի է այն, որ Ամանպուրի տեսանյութում Հայոց ցեղասպանության թեմային ընդամենը 46 վայրկյան էր հատկացված:

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: