Հեյֆեր Փրոջեքթ Ինթերնեյշնլ հայկական մասնաճյուղը ապրիլի 6-ին կազմակերպում է կլոր սեղան` «Գենդերային հավասարությունը եւ գյուղաբնակ կանայք Հայաստանում» թեմայով:

Միջոցառմանը հրավիրված են պետական եւ հասարակակն սեկտորների ներկայացուցիչներ, համայնքների ղեկավարներ` Հայաստանի տարբեր մարզերից:

Օրակարգում ընդգրկված են Գենդերային հավասարության դերը Հայաստանում քաղաքացիական հասարակություն կառուցելու գործում, Հայաստանի գյուղաբնակ կանանց իրավիճակային վերլուծություն, ինչպես նաեւ խմբային աշխատանքներ թեմաներով:

Կլոր սեղանի աշխատանքի արդյունքները կամփոփվեն եւ կներկայացվեն Հայաստանի քաղաքական եւ հասարակական մարմիններին:

Հեյֆեր Ինթերնեյշնլը շահույթ չհետապնդող, հումանիտար կազմակերպություն է, որի նպատակն է` վերջ տալ սովին ամբողջ աշխարհում, հոգալ երկրագնդի մասին` գյուղատնտեսական կենդանիների, տնկիների, գիտելիքների եւ այլ միջոցների տրամադրմամբ համայնքների բնակչությանը:Հեյֆեր Ինթերնեշնլը Հայաստանում գործում է 1999թ: Այն առ այսօր իրականացրել է ավելի քան 45 ծրագիր Հարավային Կովկասում, օգնել Հայաստանում, Վրաստանում եւ Ադրբեջանում ապրող 5000-ից ավելի ընտանիքների` կառուցել իրենց անհատական ֆերմերային տնտեսությունները: Ներկայումս Հեյֆեր Հայաստանն իրականացնում է 19 ծրագիր, որոնցից 17-ը` Հայաստանում եւ 2-ը` Վրաստանում: