Ապրիլի 7-ին համագործակցության պայմանագիր կստորագրվի Հայաստանում գերմանական համալսարանի (ՀԳՀ) և Գերմանիայի Քեհլ քաղաքի հանրային կառավարման բարձրագույն դպրոցի միջև, տեղեկացնում է ՀԳՀ մամլո ծառայությունը։
Քեհլի բարձրագույն դպրոցի հետ համագործակցության պայմանագիրը հնարավորություն կտա «Եվրոպագիտություն և հանրային կառավարում» մագիստրոսական ծրագիրը դասավանդել ՀԳՀ-ում: Մագիստրատուրայի ուսանողները հնարավորություն կունենան իրենց պրակտիկան անցկացնել, ինչպես նաև մասամբ ուսանել Գերմանիայում:
Հայաստանում գերմանական համալսարանը հիմնադրվել է 2005 թվականին երկու երկրների գիտնականների նախաձեռնությամբ: Այն համագործակցում է գերմանական բուհերի հետ և պատրաստվում է առաջարկել միայն մագիստրոսական ծրագրեր: Համալսարանն ուսումնական դասընթացներին զուգահեռ իրականացնում է բազմաթիվ գիտահետազոտական ծրագրեր, որոնք ուսումնական գործունեության կարևորագույն բաղկացուցիչն են: Առաջարկվում են նաև գերմաներեն լեզվի դասընթացներ, որոնք անցկացվում են նորագույն մեթոդներով` շեշտը դնելով հաղորդակցման ունակությունների զարգացման վրա:
