Ապրիլի 20-ին Հայաստանի ազգային գրադարանում ամփոփել են “Ազգային գրադարանների շաբաթը”, որը մեկնարկել էր ապրիլի 12-ին:
“Ազգային գրադարանների շաբաթն անցնում է արդեն 9-րդ անգամ: Այս տարի այն անցել է “Ուշադրությունը կենտրոնացնել համայնքների գրադարանների վրա”: Միջոցառումն ամեն տարի ընդլայնում է իր շրջանակները, և մենք հուսով ենք, որ ապագայում այն համահայկական կդառնա”,-ապրիլի 20-ին ամփոփիչ մամլո ասուլիսում հայտարարել է Հայաստանի Ազգային գրադարանի տնօրեն Դավիթ Սարգսյանը:
Նա նշել է, որ միջոցառման նպատակն է վերաիմաստավորել գրքերի, գիտելիքի, գրադարանների դերը, հրավիրել պաշտոնյաների և իշխանությունների ուշադրությունը գրադարանների խնդրի վրա:
“Գրադարաններն անգնահատելի դեր են կատարում քաղաքակիրթ և կրթված սերունդների դաստիարակության գործում”,-ասել է նա”
Ըստ Ազգային գրադարանի տնօրենի, շաբաթվա շրջանակներում երկրի տարբեր գրադարաններում կազմակերպվել են հանդիպումներ արվեստի, գրականության ու գիտության գործիչների հետ:
