Ապրիլի 21-ին տեղի է ունեցել Երեւանի համակցված շոգեգազային ցիկլով էլեկտրակայանի բացման արարողությանը` ՀՀ նախագահ Սերժ Սարգսյանի մասնակցությամբ:

Բացման արարողությանը ՀՀ էներգետիկայի նախարար Արմեն Մովսիսյանը հայտնել է, որ նոր էլեկտրակայանը 1 Կվտ/ժ էլեկտրաէներգիայի արտադրման համար կծախսի 2-2,3 անգամ քիչ վառելիք (բնական գազ), քան մյուս էլեկտրակայանները, ինչը թույլ կտա գազի սակագնեի բարձրացման պարագայում չբարձրացնել էլեկտրաէներգիայի գները: Բացի այդ, նոր կայանը բնապահպանական լուրջ ցուցանիշներ կունենա: “Նույն հզորությամբ աշխատելու դեպքում, ինչ մյուս էլեկտրակայանները, այն ավելի քիչ արտանետումներ կունենա` ածխաթթու գազ`2 անգամ պակաս, ածխածնի օքսիդ` 38 անգամ պակաս, ջրօգտագործում` 3,6 անգամ պակաս”,-ասել է նախարարը:

Էլեկտրակայանը կարող է աշխատել կառավարման կենտրոնից ձեռքվ կամ լիովին ավտոմատացված` մեկ կոճակի սեղմումով, օպերատորի ընտրությամբ:

Էլեկտրակայանի շինարարությունը մեկնարկել էր 2008թ. հուլիսին: Այն կառուցվել է Միջազգային համագործակցության Ճապոնիայի բանկի տրամադրած 247 մլն ԱՄՆ դոլար վարկով: Էներգաբլոկի շինարարությունն իրականացրել են ճապոնական եւ կորեական մասնագիտացված ընկերություններ:

Նոր ջերմաէլեկտրակայանի շահագործումը հնարավորություն կտա բարձրացնելու ՀՀ էներգահամակարգի հզորությունն ու հուսալիություն, նվազեցնելու էլէներգիայի կորուստներն էլեկտրական ցանցերում:

Ծրագրի մեկնարկից ի վեր Հայաստան են ներկրվել շուրջ 8070 տ մետաղական կոնստրուկցիաներ և շուրջ 3000 տ սարքավորումներ: Նախագծի պատվիրատուն է “Երևանի ՋԷԿ” ՓԲԸ-ն, խորհրդատուն է` TEPSCO LTD-ն, գլխավոր կապալառուն է Mitsui & Co-ն, և Հարավային Կորեայի GS Engineering & Construction կոնսորցիումը: