Դանիայի Հերնինգ քաղաքում Super Six World Boxing Classic մրցաշարի երկրորդ շրջանում հանդիպեցին WBC վարկածով աշխարհի չեմպիոն, բրիտանացի Կարլ Ֆրոչը և WBA նախկին տիտղոսակիր Միկկել Քեսլերը (Դանիա):
Մենամարտն ավարտվեց Քեսլերի հաղթանակով ըստ միավորների, որն երրորդ անգամ իր կարիերայի ընթացքում նվաճեց չեմպիոնի տիտղոսն ու կարողացավ առաջին երկու միավորը վաստակել Super Six World Boxing Classic մրցաշարում: Այժմ, Ֆրոչը, Անդրե Ուորդն ու Անդրե Դիրելը ունեն 2-ական միավոր, իսկ մրցաշարի առաջատարն է հայ բռնցքամարտիկ Արթուր Աբրահամը 3 միավորով: Նա միակն է մրցաշարում, ով հաղթել է նոկաուտով: Մրցաշարի առաջին շրջանում Աբրահամը նոկաուտի ենթարկեց Ջերմեն Թեյլորին, որը ստիպված էր լքել մրցաշարը: Թեյլորին փոխարինեց Ալան Գրինը (ԱՄՆ), որն իր առաջին մենամարտը հունիսի 19-ին կանցկացնի Անդրե Ուորդի դեմ: