ՀՀ փոխվարչապետ, տարածքային կառավարման նախարար Արմեն Գևորգյանն այսօր աշխատանքային այցով եղավ Ծաղկաձորում, ծանոթացավ քաղաքում իրականացվող շինարարական աշխատանքների ընթացքին, այցելեց արդեն ավարտական փուլում գտնվող “Ռոսիա” հյուրանոցային համալիր:
Ծաղկաձորի քաղաքապետարանում ՀՀ էկոնոմիկայի նախարարության պատասխանատուների մասնակացությամբ կայացած խորհրդակցությանը քննարկվեցին Հայաստանի զբոսաշրջային հիմնական կենտրոնների` Ծաղկաձորի, Ջերմուկի, Դիլիջանի զարգացման հեռանկարները: Մասնավորապես նշվեց, որ այս տարվա առաջին եռամսյակում, նախորդ տարվա նույն ժամանակահատվածի համեմատ, արձանագրվել է զբոսաշրջիկների թվի 9,4 տոկոս աճ: Իսկ Ծաղկաձորում ձմռան ամիսներին, նախորդ տարվա նույն ժամանակահատվածի համեմատ, աճը կազմել է 51 տոկոս: Խորհրդակցության ընթացքում քննարկվեցին զբոսաշրջային ծառայությունների որակի բարձրացման, ենթակառուցվածքների բարելավման խնդիրները, կարևորվեց ճանապարհային նշանների և ցուցանակների տեղադրումը: Փոխվարչապետին ներկայացվեցին ոլորտի զարգացմանն ուղղված` ընթացիկ տարում իրականացվելիք ծրագրերը, անդրադարձ եղավ հյուրանոցային գների տարբերակված կիրառման պարագայում նաև հարկային ռեժիմի օպտիմալացման խնդրին:
Ծաղկաձորի քաղաքապետ Գարուն Միրզոյանը տեղեկություններ հաղորդեց քաղաքում մասնավոր ներդրումների հաշվին իրականացվող կառուցապատման աշխատանքների մասին:
