Հայաստանի վարչապետ Տիգրան Սարգսյանը ընդունել է «Plug and Play» համակարգչային ձեռնարկությունների ինկուբատորի տնօրեն Քեյվան Բարումանդիին:

PanARMENIAN.Net-ին կառավարության մամլո ծառայությունից հայտնել են, որ հանդիպման ընթացքում կողմերը քննարկել են IT և բարձր տեխնոլոգիաների ոլորտում համատեղ նախագծերի իրականացման հեռանկարները: Կարևորել են Հայաստանում «Plug and Play»-ի ներկայացուցչություն ունենալը, ինչպես նաև Սիլիկոնային հովտում (ԱՄՆ) Հայաստանի ներկայացուցչության հիմնադրումը, որը կնպաստի IT ոլորտում հայ-ամերիկյան համագործակցությանը և մեծ հնարավորություններ կստեղծի ներդրումների, ինչպես նաև հայկական արտադրանքի իրացման համար:

«Plug and Play» ընկերության տնօրենը նշել է նաև կրթության բնագավառում համագործակցության խորացման, մասնավորապես Սթենֆորդի համալսարանի հետ ուսանողների փոխանակման պլատֆորմ ստեղծելու անհրաժեշտությունը:

Վարչապետ Տիգրան Սարգսյանը 2009 թ. Armtech-2009 համաժողովի շրջանակներում այցելել էր «Plug and Play»և ծանոթացել էր ընկերության գործունեությանը: