ԱՊՀ երկրների ղեկավարներն ուղերձ են հղել Հայրենական մեծ պատերազմի Հաղթանակի 65-րդ տարեդարձի կապակցությամբ: Ուղերձում, մասնավորապես, ասվում է. “2010 թվականի մայիսի 9-ին Անկախ Պետությունների Համագործակցության մասնակից պետությունների ժողովուրդները տոնում են 1941-1945թթ. Հայրենական մեծ պատերազմում Հաղթանակի 65-րդ տարեդարձը: Լարվածությամբ ու դաժանությամբ աննախադեպ այս պատերազմում Խորհրդային Միության բազմազգ ժողովուրդը և նրա Զինված Ուժերը պաշտպանեցին իրենց Հայրենիքի ազատությունն ու անկախությանը` աշխարհի բազմաթիվ երկրները զերծ պահելով ֆաշիստական ստրկացումից:
Ճակատում ու թիկունքում մեր ժողովուրդները ցուցաբերեցին անձնազոհություն և զանգվածային հերոսություն, հայրենասիրություն ու ինտերնացիոնալիզմ, աննախադեպ տոկունություն, առանց որոնց հաղթանակն անհնարին կլիներ: Պատմությունը նման անսասանություն չէր տեսել: Չեր տեսել նա և հաղթանակի հանդեպ նման կամք”:
“Տարիների ընթացքում չի խամրում մեր ժողովուրդների կողմից իրագործած սխրանքի վսեմությունը: Որքան շատ ժամանակ է բաժանում մեզ այդ իրադարձությունից, այնքան ավելի պարզ է գիտակցվում ապագայի իրավունքը պաշտպանած Հաղթանակի զինվորների պատմական առաքելության նշանակությունը: Դիմելով Համագործակցության մասնակից պետությունների ժողովուրդներին և համաշխարհային հանրությանը, մենք այսօր մեր պետություններում ապրող վետերաններին ասում ենք շնորհակալություն: Մենք կոչ ենք անում ոչ միայն խոսքով, այլև գործով հարգանքի տուրք հատուցել հաղթած հերոսներին, առօրյա խնամք և ուշադրություն ցուցաբերել պատերազմի մասնակիցներին և թիկունքի աշխատավորներին, նրանց համար ստեղծել կյանքի արժանավայել պայմաններ:
Մայիսի 9-ը` Հաղթանակի օրը մնում է մեր մարդկանց համար արդարության, հաղթանակի, հպարտության և այս չափազանց դաժան ու սարսափելի ճակատամարտում զոհված միլիոնների համաժողովրդական հիշատակի օրը: Մեզ համար սուրբ և թանկ են նրանց անունները, ովքեր քաջերի մահով ընկան Հայրենական Մեծ պատերազմի տարիներին: Մենք անհատույց պարտական ենք նրանց, ովքեր իրենց կյանքի գնով պաշտպանեցին Հայրենիքը, հետևաբար` մեր ազատությունը:
Մենք չենք մոռանա աշխարհը ֆաշիզմից փրկած զինվորներին և թիկունքի աշխատավորներին, ուստի, կոչ ենք անում սրբորեն հարգել իրենց Հայրենիքի ազատության և անկախության համար զոհվածների հիշատակը, մշտական խնամք ցուցաբերել զինվորական շիրիմները, հուշահամալիրները, արձաններն ու կոթողները, ինչպես նաև պարտիզանների, ընդհատակյա գործիչների և ֆաշիստական ճամբարների կալանավորների գերեզմանները պատշաճ վիճակում պահպանելու և սատարելու ուղղությամբ, ակտիվացնել Հայրենական Մեծ պատերազմի օրերին ֆաշիստական զավթիչների ձեռքերից զոհված զինվորների և խաղաղ քաղաքացիների աճյունների որոնումը”,-ասված է ուղերձում:
